La Liga a 'hot' chho ṭan

Spanish La Liga-ah Inrinni zan khan club lian pathum Barcelona, Atletico Madrid leh Real Madrid te an inlan vek a, hnehna an chang zo lo vek!

Club lian pathumin hnehna an chan zawh loh vek  avangin table a 'tight' chhunzawm a, nizana inkhel Granada-in hnehna an chan chuan table chung ber an luah ang. Barcelona-in khualmualah Levante an lenchilh a, an mikhualna ramah goal khung hmasa zuk mah se 3-1 in an mualpho. Catalan club an insiamṭha hleithei lo. 

Lionel Messi leh a ṭhiante tlawm thu hre sain Atletico Madrid leh Real Madrid an inlan a, hnehna an chang zo bik lo! Atletico-in 1-1 in Sevilla an inhnehtawkpui a, Real Madrid leh Betis chu 0-0 in an inhnehtawk bawk. 

Levante khelmualah Messi-a'n minute 38-naa penalty hmangin goal hmahruai a khung a, hetihlaia zawhna awm chu, "Eng zat tak khung belh ang maw?" tih hi a ni. Mahse, Levante-in ngaihdan dang an lo nei a, an mikhual hmaah ṭhat chhuah an tum lo. Minute 61-na aṭangin an theihna an pholang ṭan a, Jose Campana, Borja Mayoral leh Nemanja Radoja ten minute riat chhungin goal thum an rawn khung!

Barca an hawihai a, Messi 'magic' an mamawh. Argentine forward hian solo goal ropui a khung niin lang mah se video assistant referee (VAR) hman zui a ni a, Antoine Griezmann-a offside vangin pawm a ni lo. La Liga match 11 an khelh tawha a vawi thum nana tlawm Barca coach Ernesto Valverde chuan, "Ban lam ka ngaihtuah lo a, hma hun chauh ka thlir," tiin a sawi zui a, bang tura duhtu fans tan hriat a nuam lem lo ang. 

Costa vanduai zan 

Atletico Madrid-in Sevilla mualah hnehna chang turin hun ṭha nei mah se Diego Costa vanduai zan a ni a, Spain international striker penalty pet goal loh zarah 1-1 in an inhnehtawk. Sevilla muala inkhelah mualneitu lamin minute 28-naah goal hmahruai an khung a, Franco Vázquez chuan Sevilla ṭantute beiseina siamsak turin Atletico goal 'net' a tawn puar. 

Atletico tan Costa chuan si phurh a sut niin inngai mah se VAR hmanga ennawn a nih hnuah offside vanga pawm a ni lo a, minute 60-naah Alvaro Morata chuan a match hnuhnung palia goal li a khungna ni turin si phurh a rawn sut ta tho. 

Madrid khaw club-in point thum hawn turin hun ṭha an nei zui a, beisei ang erawh a ni lo - Costa hian an penalty hlawhchhuah chu a pet goal lo a, a per lehlam Koke-a'n a khung theih bik loh avangin 1-1 in an ṭin. 

Hmelma kumhlun Barcelona leh Atletico Madrid an chak loh avangin Real ṭantute an hlim a, an hmelma club an deusawh - an hun a lo thleng a, eng ruai an ni bik lo. Santiago Bernabeu-ah Real Betis hneh ngei tura ngaih an ni a, mahse an fan-te beiseina an hlawhtlintir thei lo. Real tan hian Eden Hazard  chuan goal a khung niin inngai mah se offside vanga pawm a ni lo a, Real vanduai a kaltluang. 

Vinicius Junior leh Sergio Ramos ten an fan-te lawmna thlen ngei tumin chance an nei bawk a, hei pawh Betis goalkeeper Joel Robles theihna pholanna mai a ni. Real boss Zinedine Zidane chuan, "Kan khelh dan, engkim kha a dik vel vek a, a pawi ber erawh goal kan nei thei lo kha a ni," a ti a, an finishing ṭha tawk lo an tuar thu a sawi.