Chelsea chak, Arsenal inhnehtawk, United chak lo

Premier League club lian paruk zinga chhiar tel, mah se nomawi beisei pha lo deuh tura ngaih zingah Chelsea-in hnehna an chang a, Blues hian Vicarage Road-ah Watford 2-1 in an hneh. Hetihlai hian Arsenal erawhin Emirates Stadium-ah Wolverhampton Wanderers chu 1-1 in an inhnehtawkpui a, Manchester United-in Vitality Stadium-ah Bournemouth 0-1 in an hneh lo.

Frank Lampard hoten League Cup-ah United hneh lo mah se Premier League-ah an tho chhuak lehnghal a, inkhel hmuhnawm tak lantir chungin Watford 2-1 in an hneh. Minute 5-na lekah Jorginho ball fing zet chu Blues forward Tammy Abraham-a'n goal-ah a chantir a, Watford keeper Ben Foster leh crossbar-in Christian Pulisic leh Mason Mount te goal khung tur an dansak hnuah Pulisic-a'n Abraham-a cross chu minute 55-naah a khung.

Chelsea awlsam takin an chak bik lo. Referee Anthony Taylor-a'n Blues midfielder Jorginho-a'n Gerard Deulofeu a tihtluk chu penalty-ah ngai lo mah se VAR-in thutlukna thlak sakin minute 80-naah Deulofeu-a'n siphurh a sut ṭhen. 

Injury time-ah Watford keeper Ben Foster ball tauh ṭha tak chu Chelsea Kepa Arrizabalaga-a'n ṭha takin a dang a, inkhelh banah Lampard-a'n nasa takin VAR a sawisel.

Emirates Stadium-ah Pierre-Emerick Aubameyang hmangin minute 21-naah Arsenal-in hma an hruai a, Wolverhampton Wanderers-in Raul Jimenez hmangin minute 76-naah an sut a, 1-1 in inkhel a tawp. Gunners manager Unai Emery chuan, "Kan result hi kan chhuang lo a, kan tan a ṭha lo. Ka mawhphurhna a ni a, ṭha zawka kan let leh theih nan theihtawp ka chhuah ang," tiin a sawi. Arsenal hian league match hnuhnung pathum aṭangin point hnih chauh an hmu a, inkhelh banah club ṭantuten an 'boo' nasa hle.

Manchester United chu khualmuala match thum an chak zawn hnuin Inrinni zan khan Bournemouth 1-0 in an hneh lo. Cherries chakna goal hi United academy chhuak Joshua King-a'n minute 45-naa defender Aaron Wan-Bissaka a pet khum hnua a khung a ni a, goal luhnaah hian Victor Lindelof pawhin mawh a phur lian hle.

Ole Gunnar Solskjaer chuan, "Palinaah tel phak kan duh a nih chuan tun ang inkhelah hi chuan kan chak tur a ni," tiin inkhelh banah a sawi a, an khelh dan thlirin United-in chak an phu loh bawk avangin season thara Champions League khel tur chuan insiamṭhat an mamawh nasa hle.