Jeho-a'n bronze medal a la

Mizo rawlthar Table Tennis khel thiam Jeho Himnakulhpuingheta chuan UTT National Ranking Table Tennis Championship (West Zone) junior huangah bronze medal a la.

Inelna hi Thane, Maharashtra-ah neih a ni a, cadet leh youth huangah India number 1 ni tawh Jeho hian semifinal a lut a, Inrinni khan Delhi rawlthar Yashansh Malik lakah 0-4 in a chak lo a ni. Tun hnaiah Lunglei rawlthar Jeho-a hian inelna a hmachhawn hnem hle. West Bengal-a neih zawk tâk UTT National Table Tennis Championship (East Zone) leh 2019 ITTF World Junior Circuit Premium neih zawh takah te khan junior huangah bronze medal a hlawh chhuak ve ve bawk.

Jeho chuan, "Theih-tawpin kan thawkrim a, gold medal la thei rih lo mah ila ka thlen chinah ka lawm, a aia sang zawk thlen tumin ka thawkrim zel ang," tiin Vanglaini a hrilh. November 7-14 chhung hian National Ranking Tournament pakhat Central Zone chu Bhavnagar, Gujarat-ah neih leh tur a ni a, he hunah hian Jeho-a hi a inlan chhunzawm dâwn a ni.