Rooney-a'n a thutiam a hlen

Wayne Rooney chuan World Cup-a a intiam ang ngeiin thil a ti a, New York khawpuia Hudson luiah lawng a kar - Rooney hi a ṭhiante Joe Hart leh Micah Richards ten an ṭawiawm bawk!

England legend Rooney hian World Cup round of 16-ah khan intiamkamna a nei a, Norway-in World Cup last 16-a Brazil an pet chhuak a nih chuan England-a lui hmingthang tak River Mersey-ah lawng a kar tur thu a sawi.

Rooney-a beisei loh dan takin Norway an chak zui a, Erling Haaland-a te ram hian vawi nga zet world champion lo ni tawh Brazil hi 2-1 in an hneh a, Manchester City striker Haaland hian Rooney chu a thutiama ding turin a ti zui.

Haaland hian, "Wayne, i sawi ang ngeiin lawng kara i fehchhuah ka beisei a ti a, Manchester United striker hlui Rooney-a'n a thutiam anga a tih ngei tur thu a sawi zui.

Mahse, Rooney hi US lamah BBC Sports tana Pundit hna thawkin a awm a, New York khawpuia lui lar tak Hudson-ah zawk lawng hi a kar.

Rooney chuan, "Nuam ka ti khawp mai. Fan-te an fakawm takzet a, anmahni ka zah vang liau liauin ka ti ta a ni," a ti - Norway hian World Cup-ah an chak lawm nan 'viking row' tih chu an larpui hle a, hemi denchhen hian Rooney pawhin lawng kar a intiam a ni.

A tawpah chuan chak tura a rin zawk Brazil an chak zo ta si lo a, English football legend hian a thutiama dingin, lawng a kar a ṭul phah!