Hmarchhak State football thiam ber Mizoram

NorthEast state-te football hmanga inelna sang ber Dr T Ao Football final-ah Mizoram chuan nizan khan Sikkim 1-0 a hnehin an champion. 

Champion-na goal khungtu David Lalrinmuana chu man of the match-ah thlan a ni a, Zotuitlang rawlthar Lalchungnunga Chhangte chu best player-ah thlan a ni thung. Indira Gandhi Stadium, Kohima-a inkhelah Mizoramin inkhel an thunun a, goal erawh an khung thei lo. Zemabawk North tlangval David Lalrinmuana'n minute 75-naah chakna goal a khung a, Dr T Aoa football-ah a vawi thum nan Mizoram an champion.

Mizoram coach Lalremtluanga'n semi final-a Nagaland hnehtu aṭangin player pahnih a thlak a, MS Dawngliana aiah Lalsawmzela lutin Lalmawizuala'n left back Vanlalnghenga ai a rawn awh bawk.

Tlar hnungah PC Laldinpuia leh Lalrinchhana Tochhawng an inkawp a, ding lamah Lalmalsawma awmin goalkeeper-ah Lalmuansanga a awm. Midfield-ah David, R. Malsawmtluanga, Lalchungnunga leh Sawmzela-te an awm a, tlar hmaah F. Lalrinpuia leh Malsawmfela-te an inkawp.

Mizoramin group match-a an hneh tawh loh Sikkim lakah tlawm nawn tum loin na takin an nawr nghal a, Sawmfela'n  mawi zeta a lakluh hnua goal kila a pet chu keeper Nindup Lepcha-a'n a dang ṭha takzet.

Sikkim-in goal venhim hna an thawk a, semifinal-a goal hmahruai khungtu Lalchungnunga'n goal hmahruai a khung lehah inngai mah se offside vangin pawm a ni lo. MPL7 Under 18 best player Chungnunga hian Sikkim tlarhnung tan harsatna a siam zui nasa hle.

Mizoramin goal an khung thei lo a, corner kick hmangin Sikkim-in an rum ṭhaih ve tho bawk. 2016 finalist tan hian Sanjay Rai-a'n first half-ah a tauh goal teuh takzet.

Second half-ah Sikkim-in an nawr ngam ve ṭan avangin inkhel a nung lehzual a, Mizoramin goal chance ṭha insiam an harsat. Lalremtluanga nauten hlauhthawnna an nei a, Sikkim midfielder Kilpo Namgyal Barfungpa freekick pet chu Mizoram keeper Lalmuansanga kap karah a lut teuh hle.

Final pressure sangah tawnhriat nei ṭha player danglamna a lang a, Santosh Trophy leh National Games-a Mizoram champion pui tawhtu David-a'n a hmaah Sikkim player pathum an awm chungin box pawn aṭangin minute 75-naah mawi zetin a pet goal. 

Sikkim-in Sonam Tshering Bhutia hmangin si phurh sutna hun ṭha an nei a, chu tih rualin hun tawp lama goal chance ngah zawk erawh Mizoram an la ni tho. Mizoram tan Chungnunga leh substitute Vanlalthlamuana ten keeper chauh an hmachhawn hnuah an khung thei lo ve ve a, goal dang a lut tawh lo.

Mizoram hi a lungthu kim nan Dr T Ao Football-ah an champion a, tun ṭuma an champion hma hian kum 2011 leh 2014 ah nomawi an chawi tawh bawk.

Tun ṭuma player pawimawh David, Sawmfela, Valpuia leh R. Malsawmtluanga te hi kum 2006 khan Chennai-a khelh National Sub Junior Championship-ah Mizoram tan khelin pahnihna an ni a, kum 14 hnuah Mizoram senior team an la champion pui leh thei. Mizoram manager T Vanlalhluna hi kum 2011 champion team manager tho kha a ni.