Chelsea player man to ber Morgan Rogers

Premier League club Chelsea chuan Aston Villa aṭangin midfielder Morgan Rogers an la lut dawn a, England international manah hian pound maktaduai 117 an seng dawn hem mai - an club player man to ber a ni ang.

Kum 23 mi midfielder hian Stamford Bridge-ah kum ruk khel turin contract a ziak ang a, kum khat dang pawhsei theihna dan a awm tel bawk - Rogers hian vawiinah medical a nei dawn a, he thuziak i chhiar meuh chuan an in la lut fel tawh hial mai thei.

Tun nipui transfer-ah English club ho an che na hle - Manchester City chuan Nottingham Forest aṭangin Elliot Anderson chu £116mtd-in an la lut tawh a, English player man to ber ni hman zuai mah se, World Cup zawh hma hauhin Rogers-a'n a khum lehnghal.

Rogers hi Chelsea player man to ber a ni nghal bawk a, London club-in kum 2023-a Enzo Fernandez lakluh nana an lo sen tawh zat £107mtd chu a rawn khum - Enzo hi chhuak thei dinhmunah a ding reng bawk.

West Bromwich Albion aṭanga inzir chhuak Rogers hian club tenau Lincoln City, Bournemouth leh Blackpool-ah te loan-in a lo khel kual tawh a, Manchester City Under-21 tan a inlan tawh bawk.

Kum 2023 khan Middlesbrough a zawm a, Championship club tana a khelh ṭhat avangin, season khat pawh a zawh hmain Villa hi £8mtd-in a zawm a, £15mtd thlenga sang chho thei tura tih a ni.

Mahse, Villa nen an inremnaah chuan Villa hian Rogers an hralh a, an hlep 20% chu Boro an pe ve ang tih a ni a, Championship club hian Rogers-a man aṭang hian £20.4mtd an dawng - English football-a sell-on fee aṭanga club-in an lakluh hnem ber niin Boro chuan an sawi.

Morgan Rogers hian Villa tan match 125 khelin goal 31 a khungsak hman a, assist vawi 29 a nei. Season hman zawh takah khan inelna hrang hrangah match 55 khelin goal 14 a khung a, assist vawi 12 a nei tel.

Villa hian Rogers bakah hian Youri Tielemans chu Manchester United hnenah £35mtd-in an hralh tawh bawk a, mahse, World Cup-a hming chher tak, Switzerland midfielder Johan Manzambi chu £50mtd chuangin an la lut a, Wolves midfielder Joao Gomes chu £38mtd-in an beisei bawk.