Man United an chak lo nghal

Manchetser United-in season thar atana an inpuachahna match hmasa berah Wrexham an hneh lo. Olympic Stadium, Helsinki-ah Inrinni zan inkhelah Championship club Wrexham tan Sam Smith-a'n minute 39-naah goal awmchhun a khung a, Michael Carrick-a hoten a chhanletna an nei lo.

Chelsea aṭanga Manchester United-in an lak thar Andrey Santos-a'n bul a ṭan a, senior player zingah World Cup khel pha lo Harry Maguire, Luke Shaw, Mason Mount, Bryan Mbeumo, Patrick Dorgu leh Joshua Zirkzee te an tel bawk. Inkhelh banah Carrick chuan, "Santos-a khelh danah lawmna tur ka ngah hle. Santos leh Mount te an inkawp rem a, tih ṭhat pawh an ngah. Chutihrualin a hmawr bawk turin kan la hriam tawk lo a, training kan neih tam hnuah a danglam ang," tiin a sawi.

Manchester United hian July 24, Zirtawpni hian Trondheim-ah Norwegian club Rosenborg nen an inkhel leh ang. Rosenborg zawh hian fiahna a inṭan chho ang a; club lian Atletico Madrid, PSG, Leeds United leh AC Milan te an hmachhawn dawn. Carrick-a hote hian August 30, Pathianni zan dar 9:00 hian Ipswich Town nen Premier League match hmasa ber an khel ang.