Rashford-a'n Fenerbahce a hnar

Manchester United forward Marcus Rashford chuan Fenerbahce aṭanga sawmna chu a hnar a, Michael Carrick-a hnuaiah a football zinkawng chhunzawm a duh niin journalist rintlak Fabrizio Romano-a'n a sawi.

Kum 28 mi Rashford hi November 2024-a Ruben Amorin-a'n Man United a zawm aṭang khan club-ah a tlatlum tawh lo a, January transfer-ah Aston Villa loan-in a zawm. Season tharah English forward hi Portuguese coach ruahmannaah a tel loh avangin amah duhtu Barcelona loan-in a pan.

English forward hian thutlukna a siam sual lo a, season hmasa khan Barca tan match 49 a khel a, goal 14 khungin assist 11 zet a nei thei. Catalan club tan a chet ṭhat avangin Thomas Tuchel-a'n World Cup khel turin a ko a, match nga a inlan aṭangin goal khat a khung ve.

Season a hman ṭhat avangin Rashford-a'n duhtu a ngah a, amah neitu dik tak United-ah a hlim loh avangin rimtu a ngah a, an zingah United elpui Arsenal, Manchester City leh Liverpool te hming pawh lam rik a ni. Mahse United boss thar Carrick-a'n Rashford hi a game plan-ah a telh a, season tharah enkawl a duh nia sawi a tam.

Hetiang karah hian Turkish club Fenerbahce chuan English forward lakluh an lo tum ve a, mahse Rashford hian an pu thar tur leh a teammate hlui Carrick-a hnuaiah a career siam ṭhat theih inbeiseiin Old Trafford-a cham a thlang.

Rashford hian a rang thei ang berin Red Devils training pawh a zawm leh dawn niin khawthlang chanchinbute chuan an sawi a, mahse Bryan Mbuemo, Matheus Cunha te an awm tawh avangin hmun chang turin a beih a ngai ang.

Three Lions tan World Cup khelin Rashford hi a feh chhuak mek a, nizan khan France nen pathumna nih inchuha inkhelin an result kan hre hman lo.