Villa player man to ber Manzambi

Aston Villa chuan an club chanchina man to ber ni turin Johan Manzambi chu Freiburg aṭangin an la lut a, a man zat hi chiang taka tarlan ni lo mah se, player man to ber ni lai Amadou Onana (50mtd) a khum avangin pound maktaduai 50 chuang niin khawhtlang chanchinbuten an ziak.

Kum 20 mi Manzambi hian season hmasa khan Freiburg tan match 47 a khel a, goal sarih leh assist pakua a nei thei. World Cup-ah pawh Switzerland aiawhin player pawimawh a ni phak a, match li khelin goal thum leh assist pahnih a nei thei a, 1954 hnua quarterfinal an thlen theih nan a thawhhlawk hle.

World Cup leh Bundesliga-ah Manzambi hi a che ṭha a, May thlaa Istanbul-a Europa League final-ah khan Freiburg tan hian Villa hi a lo hmachhawn tawh a, hemi ṭum hian Unai Emery-a hote hian 3-0 a hnehna changin kum 30 chhunga an trophy hmasaber an lo chawi tawh a, Manzambi hi 'Europa League Young Player of the Season' atan thlan a ni zui.

Villa hian an midfielder tawnhriat ngah Youri Tielemans chu, Manchester United-in a release clause £35m-in an lei chhuak a, World Cup-a USA nen an inhmachhawn ṭumin Onana a inhliam bawk a, thla sarih vel tal a chawlh dawn avangin midfielder an mamawh takzet a, Manzambi hi an mamawh chhanna a ni.

Swiss midfielder hi kar hmnasa khan Newcastle United a zawm teuh hle a, Magpies leh Freiburg te pawh hian inremna lo siam hman hial. Mahse, Villa hi Champions League khel tur an nih bakah hma an lak chak zawk avangin Manzambi-a'n Villa Park hi a thlang ta.

Villa hian Switzerland international bakah Wolverhampton midfielder Joao Gomes pawh an lei teuh tawh hle a, ani hian medical nei turin Ningani khan Wolves-in Portugal-a training camp an neihna a chhuahsan tawh. Gomes manah hian pound maktaduai 35 bawr vel an seng tura ngaih a ni.

Hetihlai hian an si ban nghaktu Emiliano Martinez a dinhmun a chiang lo a, Juventus chuan Argentine keeper hi an hmu tai hle. Ani bakah hian an defender Lucas Digne chuan UCL champion Paris Saint-Germain a zawm dawn bawk.