West Ham tan Bowen a rinawm

West Ham United captain Jarrod Bowen chuan an club a chhuahsan dawn lo a, Championship-a Division lama khel turin thutlukna a siam fel a, West Ham-ah a cham zel dawn.

Season tawp niah West Ham hi an relegate a, Premier League aṭanga an tlak rualin Kum 29 mi Bowen-a hma lam hun a chiang lo nghal. English forward hi Premier League club lian tak tak te nen sawizawm hial ni mah se Hammers tana khelh zel a thlang.

Kum 2020 khan Bowen Hull City aṭangin Hammers hian an lei a, club tan hian match 280 inlan tawhin goal 85 a khung tawh a, 2024-a Kurt Zouma a chhuah hnu khan captain-ah hian ruat a ni nghe nghe. Season hmasa khan West Ham tan match zawng zawng a khel kim vek a, goal kua a khung. England tan pawh vawi 22 a khel tawh a, mahse kumin World Cup-ah coach Thomas Tuchel-a squad-ah erawh a tel pha lo thung.

English forward thutlukna hi West Ham tan chanchin lawmawm tak a ni a, 2011-12 season hnuah a vawi khatna atana Championship khelh tur an nih bakah, a rang thei ang bera inelna sang bera inlan leh an tum avangin inbuatsaihna an kalpui ṭan tawh.

Bowen chuan, "He club hi Premier League-a hruai kir leh hi ka thil châk ber a ni a, kan relegate kha tu tan pawh a na, na tur reng pawh a ni. Mahse ka tan chuan he club hi ka tan a hlu a, chuvang chuan thutlukna siam pawh a harsa lo.

Hmun khata i awm rei chuan kan in ngaina telh telh a, i mawhphurhna hlen turin i thawkrim ṭhin ang. Keipawh chutiang chiah chuan ka awm niin ka hria. He hmunah hian kum ruk leh a chanve ka awm tling tawh a, mipa naupang aṭangin puitlingah ka ṭhang lian a, min chher hriamtu an nih avangin eng thil lakah mah ka tlanchhiatsan ngai lo ang," a ti.

Kum 2023-a a UEFA Conference League final-a Fiorentina nen an inkhelh khan, hun tawp dawnah Bowen hian West Ham tan chakna goal a khung a, he goal hmang hian West Ham chuan kum 43 hnuah a vawikhatna atan trophy lian an chawi theih phah.

Hammers hian Nuno Espirito Santo hnuaiah London club hian pre-season inbuatsaihna a kalpui mek a, Nuno pawh hian May thla khan season tharah club a chhuahsan dawn lo tih a lo nemnghet tawh bawk.