Aizawl FC, Police leh Chanmari an chak

Mizoram Premier League-a round 9 khelh zawhah Aizawl FC, Mizoram Police, Chhinga Veng leh Chanmari FC te chu a sang pali zingah an tel leh ta a, heng club palite hi season hnuhnung pahniha semifinal lutte vek kha an ni. Round nga khelh tur la awmah a club phan chang leh ruh no deuh an inthliar chho zel.

Zirtawpni zan Lammual inkhel pawimawhah Mizoram Police-in Electric Veng 3-0 in an hneh a, Inrinni tlaiah champion lai Aizawl FC-in Chawnpui 5-0 a sawpin zan lamah Chanmari FC-in 2-0 in FC Venghnuai an hneh ve bawk.

Mizoram Police-in phase 1-ah an elpui zinga mi Chanmari FC chiah an hneh a, phase 2-ah erawh Chanmari an hneh hnuin Electric Veng 3-0 in an hneh. Lalbiaksanga Colney hote hian R. Malsawmtluanga ball pet thiamna an hmang ṭangkai a, Darlawn tlangval MS-a hian minute 36-na leh 69-naah freekick aṭangin a khung. Police goal thumna hi F. Lalrinpuia'n (Valpuia) a khung a, man of the match-a thlan Malsawmfela siamsak a ni.

Mizoram Police hian ṭan phat aṭangin chance ṭha an ngah zawk a, Republic Veng tlangval Valpuia'n goal tam zawk khung theihna hun a nei a, Lalbiakhlua'n (Biaktea) keeper Lalmuansanga chiah a hmachhawn hnuah chance ṭha bik a hlah. BS-a Colney leh a hote pahnihnaah an invawrh chho a, kumin semifinal-ah Police an tel ngei dawn niin a lang.

Season liam ta khan Electric Vengin round 14-naah Police an hneh loh avangin semifinal an lut zo lo a, tun ṭumah pawh Police an hneh loh avangin panganaah an tla thla. Amaherawhchu tun ṭum erawh match nga khelh tur an la neih avangin inenfiahna hun an la nei thung.

Police nen hian Lalrammawia'n a hun ṭha a hlah a, goalkeeper Lalmuansanga'n MS-a freekick hmasa dan theih tura ngaihah a dang hman lo a, Police khelh ṭhat ṭum an tawng bawk. Electric Veng hian an club history-a a vawi khat nan MPL semifinal khelh an duh a nih chuan hunṭha bawhpelh a thiang tawh lo.

Hmahruaitu Aizawl FC chuan table mawngphaha awm Chawnpui lakah zah ngaihna an lantir lo. I League club tan hian F. Lalremsanga'n goal hnih a khung bakah Richard Kassaga, Alfred Kemah Jaryan leh Joe Zoherliana ten goal khat ṭheuh an khung.

Standly Rosario hote hian match sarih an clean sheet tawh a, tlarhnung leh tlarhma an khelh ṭhat avangin MPL8-a team ṭha ber anga chhal theih an ni. Chawnpui erawh an striker T. Lalnunpuia'n (Bawihpuia) goal la luh hmaa a hun ṭha neih a khung loh an tuar a, insiam ṭhat an duh avangin coach HC Zarzoliana nen an inṭhen. Nimin khan Chawnpui hian coach atan season liam taa coach Laldinthara chu Zara thlak nana an lakluh thu an puang.

Chanmari FC-in match hnih a zawna an chak loh hnuah inkhel thunun chungin FC Venghnuai 2-0 in an hneh a, MPL5 champion hmel lan dan a dang nghal. Chanmari hian goal an khung thei lawk lo a, forward Lalnunzama'n goal ban a pet per hnuah phei chuan ṭum dang ang thoin an vanduai leh dawn niin a lang hman. Amaherawhchu right back Lalbiaknia chuan goal venhim chauh duh tawk loin minute 66-naah goal hmahruai a khung a, Lunglei tlangval hian Zama goal khung tur a siamsak leh bawk.

I Day Football finalist FC Venghnuai erawhin point an hlawhchhuah zawh loh avangin paruknaah an awm chhunzawm a, Nilaini tlaiah Mizoram Police an hmachhawn lehnghal dawn avangin hmabak a hautak dawn hle.