Duran-a'n Benfica a zawm dawn

Colombian forward Jhon Durán chuan saeson tharah Benfica tan loan-in a khel dawn a, Portuguese club hian season tawpah an duh chuan Duran hi a ngheta la thei turin inremna an ziak niin journalist rintlak Fabrizio Romano-a'n a tarlang.

Kum 22 mi Duran hian a kum phu loin club a ngah tawh a, an ram club Envigado-ah bul ṭanin 2022 khan Major League Soccer club Chicago Fire-ah a insawn. Season khat hnu lawkah Aston Villa-in an la lut a, Villa tan 2023 leh 2025 inkarah match 55 khelin goal 12 a khung hman.

Nikum January transfer khan Saudi Pro League club Al Nassr-in €77 mtd zetin an lei a, Cristiano Ronaldo bakah Sadio Mane te nen an khel ho. Al Nassr tan match 13-ah goal riat khungin a khel chhe lo. Mahse season nikum vek khan nipui transfer-ah loan-in Fenerbahce a zawm a, match 10 chiah a khelh hman tihah kumin January khan loan bawkin Zenit St Petersburg-ah a lut.

Russian club tan Duran hian match ruk chiah khel hmanin goal khat a khung hman a, amah neitu dik tak Al Nassr-ah a kir leh. Mahse season tharah Benfica coach thar Marco Silva-a'n a squad thuam chak nan a duh a, Duran tan Benfica hi tun hnai thla 17 chhunga a club palina tur a ni a, a career-a a club pasarihna tur a ni bawk.

Duran hian Al Nassr-ah 2030 thleng contract a la nei a, a hlawh a tam bawk avangin club dangin a nghetin an la lut ngam lo a, Al Nassr hruaitute chuan loan-a a chhuah an phalsak niin khawthlang chanchinbute chuan an sawi.

Villa forward hlui hian an ram tan vawi 17 a inlan tawh a, mahse a nungchang a ṭhat loh vangin Zenit first team aṭanga paih a ni a, a inkhelh tam tawk loh bawk avangin World Cup khel turin Colombia-in an ko lo.