Chelsea-in Lacroix an hnaih

Chelsea chuan Crystal Palace nena inbiakna an neih thar leh hnuin, Maxence Lacroix lak luh an tumna kawngah a hmawr bawkna a awm ṭep tawh a, team pahnihten inremna an nei hnai tawh.

Kum 26 mi Lacroix hian Palace-ah kum thum daih contract a la nei a, club hruaituten Selhurst Park-ah thlun ngheh châk hle mah se amah berin chona thar hmachhawn a duh.

French defender hian Eagles hi Conference League-ah a champion pui a, season a hman ṭhat avangin duhtu a nei hrawl a. World Cup ṭan hma khan Liverpool leh Bayern Munich te nen sawizawm a lo ni tawh.

Eagles hian Lacroix manah £60 mtd vel an phut a, a aiawh tur pawh melh ṭanin Augsburg defender Chrislain Matsima chu an Lacroix thlak tura an melh a ni.

Lacroix hian August 2024 khan Wolfsburg aṭangin Palace hi £18 mtd in a zawm a, match 98 a inlan tawhin FA Cup leh Conference League an champion ṭumin tlarhnungah ban rinawm a ni.

World Cup-ah pawh France tan a inlan thei a, Premier League-a tawnhriat nei sa lak luh an tum hi Chelsea tan pawh a awm lo hran lo a, indinthar leh an tumna kawnga pui turin Lacroix-a'n an mit a la hle.

Blues hian Aston Villa aṭangin Morgan Rogers-an la lut fel ṭep tawh a, £117 mtd zet senga la lut tur an nih avangin tun season-ah pawh pawisa an ui leh dawn lo niin a lang. Xabi Alonso enkawl team hian Lacroix an la lut thei a nih chuan an defender neih sa Trevoh Chalobah hma hun a chiang tawh ang.