Villa nena sawizawm Garnacho leh Jackson

Premier League club hlun Aston Villa chuan Chelsea forward pahnih Nicolas Jackson leh Alejandro Garnacho te an ngaihven a, mahse pakhat zawk chauh lak an tum niin journalist rintlak Fabrizio Romano-a'n a tarlang.

Villa hian season hmasaa an player chhuanvawr Morgan Rogers chu Chelsea-ah £117 mtd in an hralh dawn a, Johan Manzambi leh Joao Gomes te la lut tawh mah se Europa League champion an ni a, season tharah Champions League an khelh dawn avangin squad tih chhah an duh a, Chelsea-a tlatlum lp pahnih hian an mit a la.

Season hman zawh takah khan Garnacho hian Blues tan inelna hrang hrangah match 37 khelin goal ruk leh assist pali a nei. Argentine forward hi rinrawl a ni pha lo a, match 18-ah chiah bul a ṭan a, bench aṭangin vawi 19 a lut.

Jackson erawh Bayern Munich-ah loan-in a chhuak a, match 34 khelin goal 11 leh assist pathum a nei. Mahse Senegalese forward pawh hi Harry Kane-a thachhang dawltu a ni a, Bavarians-in a ngheta lak an tum loh avangin Stamford Bridge-ah a kir.

Villa forward Ollie Watkins chu Fenerbahce nen sawizawm a ni mek a, a chhuak a nih chuan English forward thlak turin Jackson hi Unai Emery-a'n a duh nia sawi a awm. Hei bakah hian Morgan Roger thlakna turin Crysencio Summerville an beisei avangin Jackson-a'n Villa a hnaih zawk niin a lang.

Chutihrualin kum 22 mi Garnacho hi London-ah a hlim lo a, pre season atana an inbuatsaihnaah pawh training a zawm duh loh a, Villa-in la lo mah se tun nipuiah a chhuah tho a rinawm a, AS Roma chuan Manchester United player hlui hi an ngaihven bawk.

Chelsea chuan an player pahnihte manah pound maktaduai 45 aṭanga 50 ni bawr vel seng huam an awm chuan an chhuahtir hreh lo nia sawi a awm a, Xabi Alonso hnuaia indinthar tum Blues hian an kawl reng a rinawm loh.