Alex Scott-a'n contract thar a hnar

Bournemouth midfielder Alex Scott chu contract thar zawrh ni mah se a hnar a, club liante hel rawn Scott-a dinhmun a chiang lo zel a, contract thar a ziah duh loh chhan hi nipui transfer laia chhuah a duh vangah a ngaih theih.

Kum 22 mi Scott hian season hmasa khan Cherries tan inelna hrang hrangah match 39 a khel a, a khel ṭhat avangin Arsenal, Manchester United, Tottenham, Manchester City leh Chelsea te nen sawizawm a ni nghal. Thla hmasa khan Gunners hian an lo dawr tawh a, mahse Cherries chuan an lo hnar.

Cherries chuan an midfielder chu zawrh lai a nih loh thu an tarlang a, £80mtd bawr vela a man chhiar nia sawi awm mah se Scott dawrtute chu an la hnar chhunzawm zel.

Europa League khel turin Bournemouth an inpet tling a, an player hralh tak Dean Huijsen, Milos Kerkez, Illia Zabarnyi leh Dango Outtara te hralhna aṭanga sum tam tak an lo lak luh tawh bakah, Scott hi 2028 thleng contract a la neih avangin club lian dawrna an hnar hi a mak lo.

Hetihlai hian an forward Eli Junior Kroupi chu Arsenal leh Tottenham-in lak luh tumin hma an la mek a, kumin January-a an lak luh Brazil international Rayan pawh hi rimtu nei mah se a chhuah a rinawm loh.