Arsenal leh United-in Kone inchuh dawn

Premier League champion lai Arsenal leh an elpui Manchester United te chuan, AS Roma midfielder Manu Kone lak luh an tum ve ve a, French midfielder hi an inchuh dawn niin Italian chanchibute chuan an ziak.

Season hmasaa United player pawimawh Casemiro chuan Old Trafford chhuahsanin Inter Miami a pan a, a thlakna tur zawng nghalin an duh zinga mi Elliot Anderson chu an ṭhenawm Manchester City lakah an chân tawh. Sandro Tonali leh Mateus Fernandes te chuan man to takin Tottenham Hotspur an pan bawk.

Red Devils hian Manuel Ugarte la nei mah se beisei a phâk loh bakah a inhliam a, Chelsea aṭangin Andrey Santos la lut tawh mah se an midfield thuam chak nan kum 25 mi Kone an duh.

Hetihlai hian Arsenal-in league title an kawl lai chu humhim an tum a, player thar an melhin sum sen pawh an hreh lo. Tun hnaiah an hel lai Morgan Rogers chu Chelsea-in an chhuhsak avangin Kone hi chu chan ngei an tum dawn.

Kone hian season hmasa khan Roma tan inelna hrang hrangah match 37 a khel a, season thara Champions League an khelh theih nan a thawh hlawk hle. World Cup khelh zawh takah pawh France tan match nga a khel a, player pawimawh a ni phâk.

Hetihlai hian French midfielder hian Roma-ah 2029 thleng contract a la nei a, a chhuak dawn a nih chuan pound maktaduai 51 an chhiar. Mahse tunlaia player man ngaihtuahin a man hi a to lo a, nipui transfer tingaihnawmtu tur a ni.