Sporting Delhi-ah Terina a lut

Mizo midfielder ṭha Lalrinliana Hnamte chuan season tharah a club khelhna a thlak dawn a, Dungtlang/Chanmari tlangval hian Sporting Club Delhi tan a khel tawh dawn.

Terina hian season hmasa kha Chennaiyin FC tan a khel a, South Indian club-ah hmun pawimawh chang phak mah se, chona thar hmachhawn turin Delhi club lamah a insawn ta zawk.

India tan pawha inlan tawh Terina chuan, "Chenniayin-ah pawh cham thei ka ni a, mahse, chona thar hmachhawn turin ka chhuak. Season thar pawh a phurawm tawh ka ti a, kum dang zawng aiin ISL hmachhawn pawh a châkawm tawh zawkin ka hria," tiin Vanglaini a hrilh.

Kum 23 mi Terina hian Chanmari FC leh FC Pune City thawh dunna kaltlangin a professional zinkawng a zawh ṭan a, Pune City U18 team-ah bul ṭanin, Hyderabad FC reserve team tan a khel zui.

Chanmari tlangval hian kum 2021 khan East Bengal zawmin, Mohun Bagan tan a khel tawh bawk a, a professional zinkawngah ISL club pali a neihna tur chiah tihna a ni - kum naupangtêin tawnhriat a nei ṭha tawh hle.

India senior team tan vawi khat inlan ve tawhin, India U23 tan vawi 10 a khel tawh bawk a, 2022-23 season khan Bagan tan ISL Cup-ah champion nomawi a chawi.

Terina hian ruahman dan chuan SC Delhi tan hian Durand Cup a khel nghal dawn - Delhi club-ah hian kum hnih atan contract ziak phawtin, kum khat dang pawhsei theihna dan a awm tel bawk.