British-Indian-in Liverpool lei tum

Premier League club Liverpool chuan neitu thar a nei mai thei - mahse, hei hi share pumpui hralhna tur ni loin, minority stake chauh a ni a, British-Indian sumdawng hausa Amit Bhatia leh a thawhpuite chuan Reds-ah hian share neih an tum.

Liverpool neitu Fenway Sports Group (FSG) chuan thuchhuah siamin, "Amit Bhatia kaihhruaina hnuaia pawl intelkhawmte chuan Liverpool Football Club-ah share lei tumin min dawr a ni," an ti a, he thu buatsaih a nih lai hian indawrna tak erawh a la fel lo thung.

Bhatia hi Indian sumdawng hausa tawntaw Lakshmi Mittal-a makpa a ni a, kum 2004 khan Mittal-a fanu Vanisha Mittal Bhatia nen inneiin, France-a an inneihna senso hi pound maktaduai 41 a tling - a hun laia khawvela inneihnaa sum sen tamna ber a ni.

Kum 46 mi sumdawng hausa hi American investment bank & financial services company Morgan Stanley tan a thawk ṭhin a, AyBe Capital Advisers leh Breedon Group company neitu niin, real estate lama sumdawng a ni.

Bhatia hi football khawvelah pawh a mikhual lo. English club lar Queens Park Rangers-ah season 18 chhung chu a neitu zingah a tel a, club Director a ni bawk. Mahse, Thawhlehni khan QPR aṭang hian a inhnukdawk a, Liverpool lam an hawi zui.

Financial Times-in a tarlan dan chuan Bhatia leh a thawhpuite hian Liverpool-ah share an lei thei a nih chuan Reds hlutna hi pound tluklehdingawn 4.5-ah a sang chho nghal thei dawn a, hei tak hian FSG chil a tiput hle ang tih a chiang.

FSG hian kum 2010 khan Liverpool hi sum lama a talbuai lai takin, £300mtd-in an lei a, kum 2023 khan sports investment firm Dynasty hnenah minority stake an lo hralh tawh bawk. Khawthlang media ṭhenkhat chuan Bhatia leh a thawhpuite hian 30% share lei an tum niin an sawi a, £1.35tld-a lei theih an inbeisei a ni.