Chennaiyin tana khel tur Ayush

FC Goa midfielder pawimawh Ayush Chhetri chuan Goan club a chhuahsan a, Dinthar tlangval hian season tharah chuan Chennaiyin FC tan a khel dawn.

Aizawl FC aṭanga inzir chhuak Ayush hian ISL-ah club dang tan a la khel ngai lo a, kum 2022 khan FC Goa hi zawmin a la khel char char - kuminah a contract a hmang zo a, a chhuahsan dawn ta.

India tana vawi thum inlan tawh Ayush hi Goa hian contract thar an zawrh a, East Bengal-in an hnena khel turin an thlem bawk. Mahse, Aizawl FC midfielder hlui hian Chennaiyin zawm a thlang.

Kum 23 mi Ayush hian Chennaiyin tan season hnih chhung khel turin contract a ziak a, South Indian club-ah hian PC Laldinpuia nen an khel dawn a ni.

Mizo tlangval Jeje Lalpekhlua hming chher tawhna Chennaiyin-ah hian Dinpuia bakah Laldinliana Renthlei leh Lalrinliana Hnamte te season hmasa khan an khel a, mahse, player pahnih hian season tharah chuan club thar an zawm dawn.

Ayush chuan, "Terina te nen kan khel ho ang chu ka tih laiin, annin club dang an lo zawm leh daih si a," tiin fiamthu a thawh a, "Goa-ah ka awm rei tawh a, boruak thar hip pawh a hun ve tawh a ni," tiin Vanglaini a hrilh zui.

Dinthar tlangval hian FC Goa tan match 88 khel hmanin, goal khat a khungsak a, assist vawi nga a nei bawk. ISL bakah hian AFC Champions League Two, Super Cup leh Durand Cup-ah te a inlansak a, FC Goa Under-21 tan a tir lamah a khel tawh bawk.

Ayush chuan, "Clifford Miranda-a'n min rawn bia a, a team khelhtir dan hi ka nuam tih zawng a ni tel a, chu vanga zawm ka ni bawk," a ti a, Goa-a assistant coach ṭhin Clifford hian Chennaiyin a enkawl dawn - Ayush nen hian Goa bakah India U23-ah an lo inhrawn tawh a ni.