Italy-in Pep an dawr

World Cup vawi thum ngawt khel lo tawh Italy chuan an ram team siam ṭhat tumin Pep Guardiola an dawr a, Italian Football Federation president Giovanni Malago chuan Manchester City coach chhuak hlim hi an dawr ngei thu a tichiang.

Pep hian City-ah kum 10 hun a hman chhungin Premier League nomawi paruk, FA Cup pathum, League Cup panga leh Champions League nomawi a chawipui a, English football-a coach hlawhtling ber pawl a ni.

Italy hian April thlaa Gennaro Gattuso-a'n a hna a bansan hnuah a thlaktu tur coach an la nei lo a, Pep an lakluh dawn chuan hlawh lamah an insen huai erawh a ngai dawn thung.

Mahse, Malago chuan, "A hlawh chungchangah hi chuan midang ang a ni thei lo tih kan chiang," a ti a, Pep an chang thei dawn a nih chuan sum sen an inhreh lo hle niin a lang.

Hetihlai hian Italy hian an coach hlui Roberto Mancini leh an ram legend Andrea Pirlo te pawh an ngaihven tho a, Malago chuan, "Anni chauh kan ngaihtuah lo a, coach dang pawh kan ngaihven tho," a ti a, uluk taka coach tur an zawn thu a sawi.

Pep hian Italy-ah coach hna la thawk lo mah se, 2001-2003 inkar kha player a nih laiin Serie A-ah hun a lo hmang tawh a, Brescia leh AS Roma tan khel tawhin, Italian ṭawng a thiam.

Barcelona leh Bayern Munich boss hlui Pep hian, "Ka chau takzet a ni," tiin City a chhuahsan dawn khan a sawi a, Italy erawh national team a nih avangin club football ai chuan a hahdam dawn.

Premier League-a Pep-a elpui ber ṭhin Jurgen Klopp chuan an ram team Germany a enkawl dawn nia sawi a ni a, Pep-a'n Italy a enkawl bawk chuan UEFA Nations League thlengin boruak a nung thar thei ang.