Infantino hun a tawp tawh - Javier Tebas

La Liga president Javier Tebas chuan FIFA president Gianni Infantino chu football hmai tibâltu tiin a sawi a, March 28, 2027-a president inthlanah inhnukdawk turin a phut.

Spanish league hotupa hian World Cup-a tui in chawlh (hydration break) chungchang te, USA striker Folarin Balogun hremna tihtawp te, final-a chawlhlawk rei lutuk leh World Cup dawt leha ram 64-a tihpun chu a sawisel lian ber a ni.

Kum 63 mi Tebas chuan, "Ka ngaihdan chuan a hun a tawp tawh. Tun dinhmunah chuan chak lo turin tumah an din duh dawn loh avangin khingpui a nei lo a ni mai thei, mahse chumi avang chuan a hna a chelh chhunzawm tur a ni chuang lo," a ti. Infantino hian ram hrang hrang football hruaitute thlawpna a nei a, FIFA inthlan kalphung hi a tir aṭangin a dik lo tih a sawi bawk.

Hydration Break

Kumin World Cup-a inkhel zawng zawngah hydration break an hmang ziah a, hei hian sawisel a hlawh hle. Kum 2014 World Cup Brazil-in an thlen ṭum khan cooling break hi neih a lo ni tawh a, mahse khaw lum zawng 32°C aia a san chauhin an nei ṭhin.

Kuminah erawh first half leh second half-ah hydration break hi minute thum chhung an nei ngei ngei a, player te ngaihtuah vang tiin sawi mah se mi tam takin broadcaster-ten fakna siam nan leh sum tuakna angah an ngai thung.

Hemi chungchang hi Tebas chuan sawiin, "Hydration break hi thil ṭul lo a ni. La Liga-ah pawh kan nei ve a, mahse khua a lum hle hunah chauh kan hmang ṭhin. Dallas, Los Angeles, Atlanta-a stadium-ah te khan 'air conditioner' a awm vek a, ṭhutna ṭhenkhatah phei chuan kawrlum hak a ngai hial. Chuvangin Hydration break hi fakna chhuah nana siam chawp mai a ni," a ti.

Red Card

Round of 32-a USA leh Bosnia and Herzegovina inkhelh ṭumin USA striker Balogun-a'n red card a hmu a, an match dawt leha Belgium an hmachhawn hunah inlan thei lo tur a ni. Mahse Donald Trump leh Infantino te inbiak hnuah FIFA hian red card hi an suspend a, an suspend chhan engmah an sawi lo thung.

FIFA dana article 27-a suspend tura thuneihna an neih dan chauh tarlan a ni a, hetihlai hian US president Donald Trump chuan social media kaltlangin FIFA hnenah lawmthu a sawi a, Balogun-a'n Belgium a hmachhawn bawk.

Red Card chungchangah hian Tebas chuan, "Balogun hremna tihtawp a ni kha a pawi hle a ni. Belgium-in USA an hneh hlauh a, chutiang ni lo se chu Infantino kha a hna chântir thei tur hial a ni ang. Belgium an chak avangin sawi zui a hlawh tawk lo a, mahse theihnghilh theih a ni lo," tiin a sawisel.

European football thuneitu UEFA chuan FIFA thutlukna hi sawselin, "Thil thleng ngai lo a ni a, hriatthiam a harsa a, leh pawmzam mai chi a ni lo," tiin an lo sawi tawh a, he thutlukna hi UEFA president Aleksander Ceferin pawh World Cup final a inlan loh chhan pakhatah a ni.

Half time show

Kumin World Cup final-ah halftime show-ah Madonna, BTS, Shakira, Coldplay leh Justin Bieber te chu an inlan a, FIFA-in dan pelin chawlhlawk minute 27 leh second 19 lai hun an hmang. IFAB Law 7-ah chuan halftime hi minute 15 aia rei tur a ni lo.

Halftime show chungchangah Spanish football thuneitu lu chuan, "FIFA chuan a duh dan danin thil a ruahman a, football tan ni loin a hlawkna tur chauh a ngaihtuah. Chuvangin minute 27 chawlh an mamawh chuan an chawl mai ang," tiin a kâp zeuh.

Ram 64 maw!

Infantino-a'n chuan World Cup-a ram tel tur zat 64-a tihpun tumna a nei a, mahse Tebas chuan "Thil zawng zawng hi World Cup chhehvelah chauh a vir tur a ni lo. Ram tel thei zat puntir hian awmzia a nei lo. Football industry hi World Cup chauh a ni lo.

Ram chhung inelna te hi football khaidingtu zawk chu a ni. Kumin World Cup hmangin FIFA hian infiamna ropui ber football hmai a tibâl hle. Player ṭha ber berte chu an inlan ngei mai, mahse an duh dana kan kal zel a nih chuan ram inelna hi a hlu lo zo vek ang," tiin a sawi.

Engtin zel?

Nakkum March thlaah FIFA inthlanpui hi Morocco-ah neih leh a ni dawn a, La Liga president ṭawngkam avang hian mi tam takin Infantino lam an hawi loh phah a rinawm.

Spainish top flight hotute chuan an ramin World Cup an champion lai hmu turin USA-ah kal a, America-ah Infantino duh lo tak tak, a thil tih avanga puitling lo titu an tam hle niin an sawi bawk.

Heithlai hian buaina leh duhkhawp lohna tam tak karah pawh Infantino hi FIFA member 200 aia tamin an thlawp a, term lina atan president hna a chelh zui dawn nia ngaitu an tam. A thlawp lotu tlemte zingah hian Europe aṭangin Germany Football Association an langsar ber

President nih tumte hi November 18 hmain hming thehluh tur a ni a, tun dinhmunah Infantino hi president chuhtu awmchhun a ni mek a, FA ṭhenkhat chuan erawh chu an thlawpna tilang ngei turin FIFA-in an nawr lui nia sawi a awm a, hei hi FIFA ethics code hnuaiah phal a ni lo.