Belgium coach thar Van Bommel

Belgium national team chu an coach Rudi Garcia-a'n a chhuahsan hnuah, amah thlak turin Mark Van Bommel an la lut a, Dutch coach hian kum hnih daih contract a ziak.

Red Devils (Belgium) hian kumin World Cup tir lamah beisei pha lo mah se, an huaisen rah sengin quarterfinal an lut tho a, champion team spain chu 2-1 in an hneh lo. Belgium chauh hi tun World Cup-a la roja laka goal khung awmchhun an ni zui.

World Cup zawh rualin Belgium coach Rudi Garcia contract a zo a, contract thar an zawrh loh avangin team a enkawl chhunzawm dawn lo. Mahse thla khat pawh tling loah Belgium-in a thlak nan Van Bommel an la nghal.

Kum 49 mi Van Bommel hi player a nih laiin PSV Eindhoven, Barcelona, Bayern Munich, AC Mian-ah te a khel hman a, 2013 khan inkhelh a chawlhsan. Netherlands tan vawi 79 a inlan hman bawk.

A retire hnuah coaching luhchilhin 2018-19 season khan a lo khelh tawhna PSV a enkawl a, a chet ṭhatpui tawk loh hnuah a chhuak leh nghal. 2021 khan Wolfsburg a enkawl leh zeuh a, a club enkawl hnuhnung ber erawh Belgian club Royal Antwerp niin Belgian Pro League, Belgian Cup, leh Belgian Super Cup te chu 2023 khan a chawipui.

Belgian club tan che chhe lo mah se chona thar hmachhawn a duh avangin 2024 khan a chhuahsan a, team enkawl a nei leh lo. Van Bommel hian a contract a hmang zo thei a nih chuan Euro 2028-ah Belgium hi a enkawl dawn.