Modric a la inkhel zel dawn

Luka Modric chuan AC Milan-ah kum khat dang hun hman chhunzawm zel a tum a, kum khat dang cham turin contract thar a ziak dawn niin Fabrizio Romano-a'n a tarlang.

Milan coach thar Ruben Amorim-a'n Modric hi vawi tam tak a titi pui tawh a, San Siro-ah a la inkhel zel dawn tih a chiang thawkhat tawh a, season hmasa a hlawh zat €3.5mtd bawk a hlawh chhunzawm rin a ni.

Kum 40 mi Modric hi a kum tam ve deuh tawh mah se a thiam ngaiin a la thiam reng a, season hmasa khan inelna hrang hrangah match 37-ah goal hnih a khung a, assist pathum a nei bawk.

World Cup khelh zawh takah khan Modric hi Croatia tan a la inlan a, match li khelin assist vawi khat a nei a, a World Cup hnuhnung ber turah hian round of 32 thlen an ram a thlenpui.

Croatian midfielder bakah hian Adrien Rabiot chuan Milan tan a khel chhunzawm zel dawn tih a tihchiang tawh a, kumin World Cup hmang ṭha tak Rabiot hi chhuak tur angin thawm nei mah se Milan-a châm a thlang.

Hetihlai hian an forward Rafael Leao erawh a dinhmun a chiang lo zel a, Milan hian Portuguese forward hi club dangin an dawr an phalsak tawh a, a man phu tawka dawrtu a hmuh chuan an chhuahtir hreh tawh lo.