Summerville manah Al Hilal leh West Ham inrem

Saudi Pro League club Al Hilal chuan West Ham United forward Crysencio Summerville manah pound maktaduai 60 thehchhuah an inhuam a, kum 24 mi forward hi European club liam tam takin duh mah se Saudi lam a pan dawn ta zawk.

Al Hilal hian Summerville man atan £55mtd an pe phawt ang a, a chet ṭhat dan azirin pound maktaduai nga an pek belh leh dawn. Netherlands international hian medical test a hmachhawn thuai dawn niin khawthlang chanchinbuten an ziak bawk.

Premier League-a an inhamtan zawh loh hnuah West Ham chuan, Summerville hi a man phu tawka dawrtu an hmuh chuan hralh an pawi ti lo a, Dutch forward hian World Cup-ah theihna sang tak a nei tih a lantir avangin club tam takin an ngaihven.

Summerville hi World Cup-ah Netherlands tan a feh chhuak a, match li khelin goal hnih leh assist pahnih a nei thei. Round of 16 thleng zo lo mah se mimal taka a chet ṭhat avangin duhtu a ngah a, Manchester United chu a duhtu langsar zinga mi an ni a, Aston Villa-in £40mtd a an dawrna chu Hammers hian an lo hnar tawh bawk.

West Ham tan erawh man man taka Summerville an hralh hi hlawkna lian tak a ni dawn a, Hammers hian tun hnai khan an midfielder Mateus Fernandes chu £85mtd laiin Tottenham Hotspur hnenah an lo hralh tawh bawk a, mahse an captain Jarrod Bowen erawhin Hammers-a awm zel a thlang a, season tharah Premier League kaipui leha tum dawn.

May thla khan Premier League aṭangin West Ham hi an tla a, an player te hlawh tihhniam leh sum tuak an tum nghalin chumi kawngah chuan kawng dik an zawh zel a, player ṭhenkhatin an chhuahsan leh a ni pawhin a mak lo ang.