City-in Bouaddi an dawr

Manchester City chuan Lille midfielder Ayyoub Bouaddi lak luh tumin hma an la a, a man atan erawh pound maktaduai 85 vel an sen a rinawm a, mimal thilah an inrem tawh niin khawthlang chanchinbu ṭhenkhat chuan an ziak hial.

Nipui bazarah City hian Elliot Anderson, Mathys Detourbet, Jeremy Monga leh Pierce Charles te lak nan £150mtd vel an hmang tawh a, an la hman belh dawn chauh niin a lang. Pep Guardiola thlaktu atana an lak Enzo Maresca hoin Premier League nomawi chawi leh an tum hle.

City hian player dang pawh lak belh an la tum reng a, kum 18 mi Bouaddi hi an duh zinga langsar ber pakhat a ni. Arsenal pawhin Morocco international hi an duh a, mahse Mikel Arteta a chet muan zawk avangin City-in an hnaih zawk.

Bouaddi hi kumin World Cup-ah rawlthar langsar ber zinga mi a ni a, Morocco-in Brazil an hmachhawn ṭum khan midfield-ah ro a rel a, veteran midfielder Casemiro leh a hoten lakah chungnung zawkin quarterfinal an thlen nan a thawh hlawk hle.

Season hmasa khan Lille tan match 30 zet a khelin rinrawl a ni phâk a, Europe-a rawlthar hot ber zinga mi a nih avangin Lille-in tlawm takin an chhuah phal dawn lo.