Emi Martinez chawl mai thei

Argentina goalkeeper Emiliano Martinez chuan World Cup final-a Spain 1-0 a an tlawm hnuin, ram tan khelh chhunzawm tawh loa chawlh san tawh mai a hun tawh em tih a ngaihtuah mek thu a sawi.

Kum 33 mi Martinez hi ram tan vawi 67 a inlan tawh a, 2022 World Cup-a an champion ṭumin Golden Glove a lo dawng tawh. Kumin World Cup khelh zawh takah Argentina tan minute zawng zawng khel kim vekin, vawi hnih clean sheet a nei a, goal riat a chhuah.

Arsenal keeper hlui chuan, "Kan champion nawn leh theih ngei ka lo beisei a, a takah chuan, a natzia hi hrilhfiah thiam a har a ni. Final-a kan chak zawh loh avangin ka tuar na takzet a, midang tan hmun ka kensak te pawh a hun tawh a ni mai thei. Mahse kan ram tan theihtawp ka chhuah a ni tih ka sawi duh a ni," tiin instagram-ah a tarlang.

Kum 2023 leh 2024- goalkeeper ṭha ber hnena an hlan ṭhin, 'Yashin Trophy' dawngtu hian 2020 aṭang khan Aston Villa a zawm a, kum 2029 thleng contract a la nei. Tun hnaiah Juventus-in an ngaihven mek a, Turin club hian Martinez hi lak luh tumin hma an la mek.