Villa-in Garnacho an la lut ta

Chelsea winger Alejandro Garnacho chuan season khat chauh London club tan a khel hman tihin a chhuahsan lehnghal a, Aston Villa chu season khat chhung loan-a khel turin a zawm.

Mahse, kum 22 mi forward hi a loan hun zawh rualin Villa hian a nghetin an lei thei dawn a, Argentine forward hian contract pawh a ziak law sa thlap!

Garnacho hian Villa-ah hian a ngheta a khel dawn a nih chuan kum li khel turin contract a ziak lawk bawk a, a ngheta English club a zawm a nih chuan Villa Park-ah kum nga a cham dawn tihna a ni.

Villa hian a nghetin Garnacho hi la lut dawn ta se, eng zatin nge an lakluh ang, tih chu tarlan a awm chiah lo a, mahse, Blues hian pound maktaduai 43 aia tlawma hralh an phal loh avangin £43mtd chu a tling ngei niin an sawi.

Hei mai a ni lo - a ngheta Villa-in an leina turah hian thil harsa a awm lo niin a lang a, match khelh ngai zat tih vel bak harsa tak a awm lo niin khawthlang media-te chuan an tarlang.

Garnacho hian season hman zawh takah khan Blues tan hian match 43 khelin goal riat a khung a, assist vawi li a nei bawk. Manchester United midfielder hlui hi a khel chhe hran lo.

Chelsea hian Villa aṭangin Morgan Rogers chu £117mtd-in an lei a, a hnu lawkah Garnacho hi Villa lamah an kaltir ve leh ta thung a ni - Villa hian tun nipuia player pali an lakluhna chiah a ni nghal bawk.

Unai Emery enkawl team hian Johan Manzambi, Joao Gomes leh Modou Keba Cisse te chu tun nipui transfer-ah an la lut tawh a, Youri Tielemans, Donyell Malen, Enzo Barrenechea leh Lewis Dobbin te hralhna aṭangin £200mtd an hmu tawh thung.