Casemiro-a'n Inter Miami a zawm; an chhui nghal!

Nilaini khan Inter Miami chuan Manchester United legend Casemiro an lakluh thu an puang a, a hnu lawkah Major League Soccer lam chuan Miami club hi an chhui tur thu an sawi zui.

Casemiro hian Miami-ah hian kum 2027 thleng atan contract a ziak a, June 2029 thleng pawhsei theihna dan a ziak tel bawk. Mahse, Miami fan-ten Brazilin midfielder lakluh an lawm hnu lawkah thu lawmawm lo hriat tur an dawng.

MLS chuan, "Inter Miami-in Casemiro an lakluh danah fel lo a awm nia sawi a ni a, hemi chungchang hi kan chhui nghal dawn a, engkim tihfel a nih hma chuan kan sawi zui rih lo ang," an ti.

US top flight league-ah hian ram danga an hman ngai loh, 'discovery rights' tih chu hman a ni. MLS club-te khan an player duhte chu discovery list-ah dahin, panga chin an dah thei a, chu chu club dangin an lo dawr ve a rem lo.

LA Galaxy chuan Casemiro hi an discovery list-ah an dah a, mahse, Miami hian Casemiro an lakluh hma hian LA Galaxy nen an inrem thlap niin an sawi.

MLS chuan, "Inter Miami leh LA Galaxy ten discovery rights chungchangah inremna an neih thu sawi mah se, thil dik lo awm nia sawi hi kan zirchian zawh hnuah engkim puanzar a ni ang," an ti.

Casemiro hian January khan Manchester United a chhuahsan tur thu a puang a, Red Devils tan match 160 khel hmanin, goal 26 a khung a, assist vawi 14 neiin, League Cup leh FA Cup-ah a champion pui.

Real Madrid tana Champions League nomawi panga chawitu Casemiro chuan, "LA Galaxy nen hian kan lo inbe tawh ngei a, mahse, Inter Miami zawm ka duh thu ka hrilh. Miami khawpui hi kei leh ka chhungten nuam kan ti a, club hmachhawpte hian min tiphur bawk.

"Ni e, khawvela footballer ṭha ber pawl Lionel Messi an kawl bawk a, ani nena khelh dun ka châk vang a ni tel bawk. Bechkham, Jorge leh Jose te hnenah lawmthu ka sawi a ni," a ti a, Miami a zawm chhan sawiin, club neitute chungah lawmthu a sawi bawk.

Inter Miami neitu zinga mi Sir David Beckham chuan, "Casemiro hi nomawi chawi ṭhin player a ni a, Real leh United-a career duhawm tak a hman hnua Miami zawm a thlang hian min tilawm takzet a ni," a ti.

Hetihlai hian Miami hi transfer chungchanga chhui an nih vawi khatna a ni lo a, kum 2021 khan Juventus aṭanga midfielder Blaise Matuidi an lakluh danah fel lo awmin, dollar maktaduai hnih chawitir an ni lo tawh.

MLS danah club tinin designated player pali an nei thei a, heng player palite hi MLS-in hlawh pek phal chin a duansakah an tel ve lo - an duh ang zat an hlawhtir thei tihna a ni.

Matuidi hi designated player ni si loin, hlawh tam tham tak Miami hian an lo pe a, hei vang hian an hrem a ni. 'Designated player rule' hi kum 2007-a Beckham-a'n LA Galaxy a zawm khan hman ṭan a ni a, 'Beckham rule' ti pawha hriat lar niin, mahse, a club-in a hming chawia an phuah dan chu an bawhchhia a ni ber!