Saliba an zai dawn lo

Arsenal chuan an defender pawimawh William Saliba hnungzâng na chu endik a nih hnuah zai a ngai dawn lo a, mahse a chawlh chhung a rei dawn niin an sawi a, a lo kir leh hun tur sawi chian theih a ni lo.

Sailba hi London-a a kir hnuah specialist rawn a ni a, zai kher ngai loin uluk zawka inenkawl turin thutlukna an siam. Marseille tan pawha khel tawh defender hi zai a nih chuan a dam leh nan hun a duh rei dawn avangin, zai a ngai lo tur hi a tan leh club tan thu lawmawm a ni.

Kum 25 mi defender hi hun eng emaw lai aṭang khan hnungzâng na vangin a lo buai tawh a, World Cup thlengin he harstana hian a kiansan lo. Semifinal-a Spain nen an inhmachhawn ṭumin Saliba hi minute 30-chauh a inkhel thei a, Crystal Palace defender Maxence Lacroix-a'n thlakin 2-0 in an chak lo zui.

French defender hian ball a chan laiin a pet chhuak a, na tuar chhunzawm thei loin leiah a ṭhu hnawk. Medical team ten an buaipui laiin "Ka hnungzang a na lutuk" a ti a, hemi hma pawh hian tlarhnunga a dinpui Dayot Upamecano hnenah a tawrh theih tawh loh thu a lo sawi bawk.

Season hmasa khan Saliba hian Arsenal tan inelna hrang hrangah match 50 a inlan a, kum 22 chhung zet an lo nghah tawh Premier League title a lakpui bakah Champions League final an thlen pui bawk a, a awm lo tur hi Gunners tan channa nasa tak a ni dawn.

Gunners hian Saliba dam hmain a hmun ruak hnawh khat turin Ezri Konsa leh John Stones te an ngaihven a, mahse defender pahnih hian duhtu an ngah avangin lak an awlsam dawn lo.

Mikel Arteta team-te hian August 16-ah Manchester City nen Community Shield inchuhin an inhmachhawn dawn a, ni nga hnuah Premier League kai thar Coventry an mikhual dawn.