Referee lar Anthony Taylor a chawl

Anthony Taylor chuan kum sawmhnih chuang a thawh tawh hnuah a referee hna a chawlhsan thu a puang a, English referee hian inkhel a ham lai kan hmu tawh dawn lo. World Cup last 16-a Portugal leh Spain inkhel kha a career-a tawpna a ni zui.

Kum 47 mi Taylor hian 2002 aṭangin referee lam a luhchilh a, England Division hniam lama inkhel a ham hnuah 2010 khan Premier League inkhel enkawl pha chinah hlankai a ni a, February 2010 khan EPL-a a vawi khat nan Fulham leh Portsmouth inkhel-ah referee a ni.

English referee hi khawvel huap pawha referee lar ber zinga mi a ni zui a, a career-ah match 831 inkhel a enkawl hman. Season 16 chhungin Premier League-ah match 432 a ham a, domestic cup final lian zawng zawngah official a ni pha bawk.

International match 163 a enkawl hman zingah Taylor hian 2020 UEFA Super Cup, 2021 Nations League final, 2022 Club World Cup final, 2023 Europa League final leh 2024 Champions League semi-final te chu a enkawl langsar zual an ni.

A career chungchangah Taylor chuan, "Level sang ber thlenga referee nih hi thil hlu tak a ni a, mah se kan mawhphurhna a len avangin sawisel kan tawk reng tho. Tunah chuan ka career-a bung thar ka kai hun a lo thleng ta.

Ka assistant pahnih, Gary Beswick leh Adam Nunn te, ka referee pui dang leh he game-a khang hun zawng zawng min hmanpuitute chungah lawmthu ka sawi bawk. Ka hnathawhna thilte avanga harsatna tam tak tawh chung pawha min thlawp reng avangin, ka chhungte leh ka ṭhiante hnenah ka lawm bawk a ni," a ti

Pro Ref-a chief refereeing officer, Howard Webb chuan, "Anthony hi ram chhung leh ram pawnah hun rei tak chhung min ṭha takin a hna a thawk a, England-in referee kan neih zinga hlawhtling leh ṭha ber zinga mi a ni. Entawn tlak takin a field chhung leh pawnah a khawsa reng a, a kal zelna turah duhsakna ka hlan a ni," tin Taylor a thlah liam.