Spurs chakna Fernandes goal 'mawi'

Tottenham Hotpur chuan Nilaini khan MK Dons nen friendly match an khel a, minute thumna leka Mateus Fernandes goal ropui hmangin hnehna an chang. Spurs training ground-ah inkhel hi neih niin entu an awm lo.

West Ham aṭanga £85mtd zeta an lak luh hian League One club lakah hian mawi takin a volley goal a, "Ka career-a ka goal duh ber a ni. Box pawn aṭanga pet hi ka zir nasat zual a ngaiin ka hria, hei ai ṭha hian ka la pet goal theih ngei ka ring" a ti.

Portuguese midfielder bakah hian Newcastle United aṭanga £100mtd zeta an lak luh Sandro Tonali-a'n bul a ṭan bawk a, Fernandes nen hian midfield-ah an inkawp. Antony Kinsky chuan goal vengin, season thara an 'first choice' a nih a rinawm. An keeper thar Martin Dubravka pawh pawh substitute aṭanga lutin save ṭha tak a nei bawk.

Season hmasaah Spurs hian beisei an pha lo a, 17-naah season kharin Roberto de Zerbi hoin Premier League-ah an inhamtang thei hram. An hmelma Arsenal an champion bawk avangin an tan season chhinchhiah tlak a ni lo. Club hotuten chetsual nawn an tum tawh lo a, nipui transfer-ah sum an hmang hnem tawh hle.

Fernandes leh Tonali bakah hian defender Andry Robertson leh Marco Senesi te chu a thlawna an lak bakah, Brighton & Hove Albion aṭangin Jan Paul van Hecke chu £52 mtd sengin an la lut tawh bawk. Hei bakah hian Manchester City forward Savinho lak luh tumin hma an la mek.

Spurs hi pre season tour nei turin New Zealand-ah an thlawk chhuak leh nghal a, Pathianni hian Eden Park-ah A-League side Auckland nen friendly match an nei ang.