Russell chungah rinna kan nghat - Wolff

Mercedes principal Toto Wolff chuan Belgian Grand Prix-a an driver George Russell-a chet dan chuan a tilungngai tih a sawi a, British driver chu che fuh tawk lo mah se a chungah rinna an nghah thu leh Hungarian GP-ah a thawh leh nghal a rin thu a sawi.

Belgian GP-ah khan kum 28 mi Russell hi lap khatna lekah Ferrari driver Lewis Hamilton nen an intai palh avangin a chesual a, a tlan chhunzawm thei dawn lo tih a chian hnuah track a chhuahsan a, point a hmu hman lo.

Wolff chuan, "Kan engine hi kawng ngilah duhthu a sam lo ṭhin, chu chu Russell a chetsual chhan lian tak pakhat a ni. A tan inelna duhawm lo a ni a, mahse a chungah rinna kan nghat tlat.

A chetsual chhan kha a engine ṭhat tawk loh vang a nih bakah, a khalh dan vang pawh a ni thei tho. Mahse hemi kawngah hian kan ṭan ho vek a ngai a, kan tihsual siamṭhat hna thawk leh turin chhuanlam kan siam a thiang lo.

Kum 41 mi Hamilton chu Russell a tai avangin second nga paihsak a ni a, palina niin podium a lawn pha lo chiah chiah. Hetihlai hian a teammate Charles Leclerc chu McLaren driver Oscar Piastri nen intai ve tho mah se hrem a ni ve lo thung.

Mercedes driver Russell hi table-ah pathumna niin hmahruaitu a teammate, Andrea Kimi Antonelli chu point 50 zetin a pha lo a, a chungah Hamilton awmin point ngain an inthlau thung. Russell-a hnuaiah hian Leclerc awm bawkin point 28-in an inthlau a, Mercedes leh Ferrari ten table chung lam an luah.