Fulham-in Gonzalo Garcia an duh

Premier League club Fulham chuan Real Madrid aṭangin striker Gonzalo Garcia lak luh tumin inbiakna an nei mek a, Cottagers hi Real coach hlui Alvaro Arbeloa-a'n a enkawl dawn avangin Garcia la lut turin beisei an nei sang hle.

Kum 22 mi Garcia hi Europe club eng emaw zatin an ngaihven a, mahse Los Blancos-a a pui hlui Arbeloa hnuaiah bawk a khelh leh châk a rinawm. Cottagers hian Garcia hi loan-a lak an duh nia sawi a awm.

Raul Jimenez-a'n kumin nipuiah a contract a zawh avangin club a chhuahsan dawn a, Rodrigo Muniz a inhliam bawk avangin tlarhma lamah duhthlan tur an ngah lo. Bayern Munich forward Jonah Kusi-Asare chu loan-in an lo la tawh amah se Garcia hi an duh.

Real-in season hmasaah beisei an pha lo a, an ropuina rama hruai kir leh turin an coach hlui Jose Mourinho an la lut. Portuguese coach hnuah indinthar hna thawk tur an nih avangin inlak luh leh inṭhuah fai hna an thawk a, Garcia hi rinrawl a ni dawn tih a tiam theih loh avangin a hma hun chu a kutah a awm.

Madrid academy chhuak Garcia hi November 2023 khan Carlo Ancelotti hnuah a vawi khat nan senior team tan a khel a, tun thlengin match 51 inlanin goal 13 a khung tawh a, assist vawi sarih a nei bawk.

Nikum Club World Cup semifinal an thlen ṭum khan Real tan goal li a khung a, Golden Boot a dawng nghe nghe. Kum 2030 thleng a contract pawtseiin a chungah beisei a sang hle.

Mahse Real boruak a chhe zui a, Xabi Alonso an ban hnuah player te inkarah buaina a awm. Garcia hian match 39-ah inlanin goal 8 a khung a, mahse La Liga-ah vawi kua chauh bul a ṭan thung, France captain Kylian Mbappe a awm avangin hmun pawimawh a chang pha lo.

Garcia bakah hian Franco Mastantuono chuan loan bawkin Olympique Lyon a zawm dawn niin Fabrizio Romano-a'n a tarlang a, defender Raul Asencio pawh a chhuah an phalsak tawh niin a sawi bawk.