Mizo fighter-ten national inelna hmachhawn dawn

MMA India National championship neih tur atan Mizoram State Mixed Martial Arts Association (MISMA) chuan fighter 14 ngawt a tir chhuak a, MISMA chuan medal ṭhahnem tak hawn theih an inbeisei thu an sawi.

Nimin aṭanga neih ṭan Championship hi July 27, Thawhṭanni thleng awh tur a ni a, Indore, Madhya Pradesh-a neih tur inelnaah hian State leh UT 29 aṭangin MMA fighter engemaw zatin inelna an hmachhawn dawn.

Weight khatah state aiawhin mi pahnih aia tam lo tel theih a ni a, hei vang hian MISMA pawhin weight category inanga inlan turin fighter ṭhenkhat chu a tir a ni.

National Championship-ah hian professional fight night pawh neih tura ruahmanna siam niin, July 26, Pathianni zanah neih tur a ni dawn a, main event-ah Mizo tlangval Lalnunsanga Chhakchhuak chuan India aiawhin, Azerbaijan fighter Ceyhun Rafiyev a hmachhawn dawn.

MISMA chuan professional fighter an chher belh zel thu sawiin, "Tunah hian Nazareth Lalṭhazuala leh Zarmawia ten hlawhtlinna an chang chho mek a, anni bakah hian professional fighter pathum kan chher chhuak leh tawh a ni," an ti - national championship-ah pawh beiseina sang tak an nei.