Ngaihven hlawh Hungarian Grand Prix

Formula 1 tlan kawng zinga ngaihven hlawh Hungarian Grand Prix chu Pathianni zan dar 6:30-ah neih a ni leh dawn a, F1 ngainatuten Hungaroring (an tlanna hmun tur) lam an hawi leh ṭhup dawn.

A harsa dawn

Hungaroring-ah hian kawng a kawi nasat avang leh a zim avangin, F1 inelna hmun danglam zinga chhiar tel a ni a, thluak hman ngai a ngaih nasat avangin driver te tan inthlahdahna hman a awm lo a, 'Monaco hungna tel lo' ti hiala sawi ṭhin a ni.

Inlehpelh a harsa ṭhin a, chuvang chuan qualifying bakah tyre enkawl leh pit lama hnatawktu team te thlengin an mawhphurna a sang em em vek a, anni chet dan hian pakhatna ni tur a hril thei hial ṭhin

He track hi Hungary khawpui Budapest hnaihah sak a ni a, khua a lum tura ngaih a nih avangin driver te tan khaw lum ringawt pawh hi buaina pakhat a tling leh dawn. Ruah lo sur pawh ni se tlan a tih awlsam phah dawn loh avangin driver te bawk an pawimawh ang.

Hungarian GP-ah hian kawng ngil a awm tlem a, a awmchhun ho a sei loh bawk avangin karting track nen an khaikhin fo. Kawng kual awm dan hi Monaco nena khaikhin a hlawh bawk a, Circuit de Monaco-a ang chiahin driver tam tak chuan an car an khalh ṭhin a, kawng kawi leh kual an ngai pawimawh hle

Russell thawhlehna

Austrian GP-a hnehna a chan hnu lawk khan George Russell-a lakah beiseina a sang a, British GP-ah pahnihna ni lehin an ram leilungah a che chhe hran lo. Mahse Belgian GP-ah Lewis Hamilton nen an intai avangin a chesual a, lap khatna lekah track a chhuahsan.

Mercedes driver chuan, "Hetiang chetsualna hi chu tun season-ah ka tawng ngun lutuk a, ngaiah ka nei tawh," a ti hial. Tun season-ah a teammate Andrea Kimi Antonelli a che ṭha a, hmahruaitu ni mekin Russell nen point 50 zetin an inthlau a, an inkarah Hamilton a awm bawk.

Tun season a hman ṭhat tawk loh avangin Russell-a'n chanchin a ngah a, Mercedes-a a dinhmun a nghing anga sawi a ni hman hial. Amah ringhleltute ka hupsak a duh a nih chuan British driver hi Hungarian GP-ah a chet ṭhat a ngai.

Hamilton leh Ferrari

Inelna hnuhnung ber Belgian GP-ah Hamilton-a'n Russell a tai avangin point nga paihsak a ni a, kum 41 mi driver hi podium-ah a lawn pha lo. A teammate Charles Leclerc erawh a vannei a, McLaren driver Oscar Piastri tai mah se chetsualna a thlen zui loh avangin hrem a ni ve lo.

Belgian GP-a an chet dan vang ringawt pawhin mipuiin Ferrari te nghakhlel takin an thlir a, hei bakah hian Hungarian GP-a vawi riat chaka, record chelh mektu Hamilton hmuh an châk. Hamilton pawh hian a Belgium-a a tihsual siam ṭha tur leh record siam belh tumin ṭan a la ang.

Engtin zel?

Max Verstappen pawh ngaihthah a thiang lo a, Red Bull driver hi season tir lamah beisei pha lo mah se tun hnaiah hma a sawn a, chak la nei lo mah se vawi thum podium-ah a lawn tawh.

Kum 29 mi Verstappen pawh hian Hungaroring-ah record a nei chhe hran lo a, kum 2022 leh 2023 khan a zawnah hnehna a lo chang tawh a, hei hian inrin tawkna nasa tak a pe ang.

Hetihlai hian Aston Martin leh McLaren te chuan an car-ah upgrade thar an nei nual a, hei vang hian team pahnihten ngaiven an hlawh hle. McLaren hi table-ah Mercedes leh Ferrari hnuai chiahah an awm a, an inthlauhna a tam loh avangin an tan hun ṭha a ni.

Hungarian GP hnuah hian chawlh a awm rei dawn a, inelna neih leh hmasak ber tur Dutch GP chu August 23-ah daih a nih tawh dawn avangin, nuam taka chawlh an hman duh dawn avangin driver te an ṭang dawn a, intlansiak hmuhnawm a beisei ngam.