Leeds-in Trafford an duh

Leeds United chuan Manchester City goalkeeper James Trafford lak luh tumin hma an la mek a, England international hi Etihad Stadium-ah hmun a chan loh avangin a chhuah mai a rinawm

Trafford hian season liam ta khan Burnley aṭangin a inzir chhuahna City-ah a let a, inelna hrang hrangah match 17 khelin Carabao Cup leh FA Cup a chawi. Kum 23 mi Trafford hian beiseina sang tak nen City zawm leh mah se Gianluigi Donnarumma an lak leh nghal avangin rinrawl a ni pha lo.

Newcastle United leh Aston Villa te pawhin Trafford hi lak luh an duh a, mahse Leeds an chet ran zawk bakah goalkeeper-ah buaina lian tham an tawh loh avangin Trafford an kiansan.

Hetihlai hian Leeds erawh an keeper pahnih Karl Darlow leh Illan Meslier te'n an chhuahsan a, club lian ve ve zawmin Darlow-a'n manchester United a zawm bakah Arsenal-ah Meslier a lut.

Goal veng turin Lucas Perri leh Alex Cairns te la nei mah se 'first choice' a hman atan an iai avangin, keeper thar an melh a, Trafford hi an duh ber. Whites (Leeds sawina) hian Trafford hi mumal takin la dawr lo mah se, a man atan City-in £50 mtd an chhiar aia hniama an lei theih an inbeisei.