Napoli-ah KDB a cham dawn

Napoli sporting director Giovanni Manna chuan an midfielder Kevin De Bruyne chuan contract a la neih angin, club-ah a châm chhunawm zel dawn tih a sawi a, coach thar Massimiliano Allegri hnuaiah pre season duty atan a in report ngei a beisei thu a sawi bawk

Belgian midfielder hian tun hnaiah an manager hlui, Antonio Conte-a 'defensive tactics' a sawisel hnuin chhuak tur anga sawi thawm a tam a, World Cup khelh zawh hnuah thuthang te awm zui mah se, Manna chuan a chhuak dawn lo tih a nemnghet.

Kum 35 mi De Bruyne hian season hmasa khan Conte nen an ngaihdan an inan loh avangin harsatna a tawk a, "Ka tan chuan a harsa ngei mai, a chhan chu Conte-a football thlirdan hi ka danglam takzet a, he thil hi kan ngawihsan mai tur a ni lo," tiin chanchinbu mite hnenah a sawi.

Hemi hnua hian Italian manager hnuaiah hmun pawimawh a chan ngai loh thu leh, field chhungah theihtawp chhuah mah se a a thiam thil pholanna chance a neih loh thu a a sawi bawk.

Manchester City midfielder hlui hi an 'defensive tactic' setup chungchangah a lungawi lo hle bawk a, "Defence lam kan ngai pawimawh leh lutuk a, 5-4-1 formation hmanga match tina goal khat lek thun hi thil nuam tak a ni lo," a ti.

Conte a chhuah hnuah a ngaihdan an zawhnaah KDB chuan, "Ka tan chuan a lawmawm a, ka ngaihdanah chuan a awm chhunzawm zel kher a ngai lo," tiin a chhang. He thil avang hian club hruaitute an lawm lo a, Belgian midfielder hi a chhuah ve mai a rinawm hman.

Mahse Manna chuan club KDB thilsawi te an hria a, mahse harsatna lian tham a awm zui loh thu a sawi rang hle. Napoli sporting director chuan "A ṭawngkam ṭhenkhat kha ka duh loh tak tak chu a awm ngei mai, mahse harsatna a awm lo," tiin a sawi.

Manna chuan Allegri hnuaia project tharah De Bruyne chuan hmun pawimawh a chan tur thu a tichiang zui a, player ten an hma lam hunah thuneihna an nei lo tiin a sawi bawk. KDB chu a chhuah tur thuah thutlukna siamtu tur a ni lo a, a teammate te nen season thar atana rilru pe turin a duh thu a sawi.