Senegal coach thar tur Vieira?

Senegal chuan an coach thar ni turin Patrick Vieira chu an rim mek a, French midfielder hlui hi Senegal-in an duh ber niin journalist rintlak Fabrizio Romano chuan a tarlang.

Vieira leh Senegal te hian inbiakna an nei mek a, mahse inbiakna hi ṭantir chauh a la nih avangin inremna engmah a la awm lo. The Lions of Teranga (Senegal) hi World Cup hnuah enkawltu nei loin an la awm chhunzawm zel.

Vieira hi Senegal khawpui Dakar-a piang a ni a, France tan inlan mah se Senegal nen an inhnaih hle. Arsenal midfielder hlui hian Nice, Crystal Palace leh Strasbourg te a lo enkawl tawh a, 2024-25 season khan Serie A club Genoa a enkawl a, hei hi a club hnuhnung ber a ni.

National team lamah Vieira hian tawnhriat a la nei lo a, chona thar hmachhawn nuam ti chi a nih avangin Senegal a enkawl lo ang tih a sawi theih loh.

World Cup-a an tlak hnuah Senegal hian anmahni enkawltu Pape Thiaw ban a ni a, December 2024 aṭangin an Thiaw hian Senegal a enkawl ṭan a, kum khat leh a chanve a enkawl hman.

Group stage-ah Senegal hian France leh Norway an hneh lo nghal a, mahse match hnuhnung berah Iraq an hneh avangin knockout stage an lut thei hram. Mahse last 32-ah 2-0 a hma an hruai tawh hnuin Belgium lakah an tlawm.

Belgium laka an tlawm hnu hian player ṭhenkhat an lungawi lo a, an zingah Pape Gueye chu langsar berin, Thiaw hian Senegal a enkawl chhung chu an ram tan inlan a tum tawh loh thu a lo sawi tawh a ni.

Hetiang boruak karah hian Senegal hruaitute chuan kum 45 mi Thiaw hi chhawr zui zel an tum bik lo a, 2002 World Cup-a Senegal tana lo feh chhuak tawh Thiaw hi an ban.

Thiaw hian kumin kum tir khan AFCON-ah Morocco hnehin Senegal hi a champion pui a, mahse an champion-na hi hlihsak leh niin Morocco chu champion-ah puan leh hnuhnawh an ni. Senegal hian Court of Arbitration for Sport-ah an lungawi lohna an thlen leh tawh a, an nomawi hi chan leh an la beisei reng.