Keegan hriatrengna hun hmang dawn

Premier League club Newcastle United leh Liverpool te chuan St James' Park-a season thar atan an match hmasa ber an khelh hunah, Kevin Keegan hriatrengna hun hman an tum a, club pahnihte hian ruahmanna siamin an inbia.

Player leh coach ropui Keegan chu Thawhṭanni khan kum 75 mi niin a thi a, a inkhelh laiin Liverpool tan a khel hman a, Newcastle-ah pawh player leh manager anga sulhnu ṭha tak a neih avangin club pahnihte tan 'legend' a ni.

Magpies leh Reds hian August 23, Pathianni zan dar 9:00-ah tun season Premier League-a an match hmasa ber atan an inhmachhawn dawn a, he hunah hian Keegan hriatrengna hun hman an tum a, hun hman dan tur relin club pahnihten inbiakna an nei.

Newcastle chuan, "inkhel ṭan hmain Keegan hriatrengna hun hi hman ngei kan tum a, he huna kan hman turah hian club ṭantute bakah football ngainatute chuan min thlawp turin kan ngen a che u," tiin thuchhuah an siam.

Keegan hriatrengna atan hian Newcastle mipa, hmeichhia leh under 21 team te chuan pre season match an khelh turah armband dum an hreng vek dawn. Vawiin tlai dar 5:00-a Gateshead an lenchilh hunah, Eddie Howe leh a naute hi minute khat chhung ngawi renga ding chungin zahna an lantir dawn.

August 15 leh 16, 2026-a Magpies-in Bayer Leverkusen leh Strasbourg an hmachhawn hunah, minute sarihna a thlen veleh Keegan-a thlalak chu St James' Park screen-ah tarlan a ni dawn a, hei hi player a nih laia a hak ṭhin no. 7 hriatreng nan a ni. Hetiang chiah hian hmeichhe team-in August 16, Pathiannia Inter Milan an hmachhawn hunah an ti ve dawn bawk.