Arsenal-in Vini an ngaihven

Premier League champion Arsenal chuan Real Madrid-a contract thar la ziak lo, winger Vinicius Junior an ngaihven a, Madrid khaw club aṭangin London khawpuiah insawntir an tum dawn.

Kum 26 mi forward hian Real-ah thla 12 chiah contract a nei tawh a, mahse, an indawrnaah beisei angin inremna an nei hleithei lo. Real pawh hian kum khat hnua a thlawna chhuahtir ai chuan man to taka hralh theih laia hralh hi an duh mai thei.

Hetihlai hian Arsenal hian Real Madrid hi he thu buatsaih a nih lai hian an la dawr lo a, club chhungkuaa thuneitu sangte erawh chuan Vini lakluh tuma bawhzui hi an remti tawh.

World Cup 2026-a Brazil tana goal li khungtu Vini hian kum 2018 khan Flamengo aṭangin Real hi a zawm a, inelna hrang hrangah match 375 inlansakin, goal 128 a khung bakah, assist vawi 100 a nei.

Mahse, Real Madrid-in Kylian Mbappe an neih hnuah a changtupa dinhmun a luah phak tawh lo a, hei vang hian chhuah a hnial lo niin an sawi - Mbappe hlawh ang zat a phut chu Real hian pek an rem ti lo bawk.

Kum 26 mi Vini hian Real tan La Liga nomawi pathum chawi tawhin, Champions League-ah ringawt pawh vawi hnih a champion tawh a, season hmasa khan inelna hrang hrangah match 53 khela goal 22 khungin, assist vawi 14 a nei a ni.