Joe Gomez inhliam lehnghal

Liverpool defender inhliam ngun ve tak Joe Gomez chu pre-season tour-ah a inhliam a, Reds hian season thar atana inbuatsaihna inkhelah 4-2 in Sunderland hneh mah se, an lawm a kim lo.

USA-a tour nei mek Liverpool tan Kieran Morrison, Dominik Szoboszlai, Federico Chiesa leh Lewis Koumas ten goal khat ṭheuh an khung a, mahse, captain armband hreng chunga bul ṭan Gomez chu minute riatna lekah lakchhuah a ngai.

Liverpool manager Andoni Iraola chuan, "Kan tana chanchin lawmawm lo tak chu Joe inhliam thu hriat hi a ni. Player inhliam awm miah loa kan training theih avangin kan hlim hle a, mahse, kan inkhelh rualin Joe kan chân nghal ringawt a ni," a ti.

Reds hian Ibrahima Konate an chhuahtir a, captain Virgil van Dijk chuan chawlh a la hmang bawk. Jeremy Jacquet an nei thar a, mahse, ani pawh hi hliam damkawr niin, kum 19 mi Giovanni Leoni chu a hliam enkawl mek a ni bawk.

Iraola chuan, "Jeremy hi kan la dim deuh. Inkhel loin hun rei tak a awm tawh a, tour tawp lamah a inlan thei ang," a ti a, Black Cats lakah hian kum 18 mi ve ve Mor Talla N'diaye leh Ifeanyi Ndukwe te centre back-ah inkawpin a tawp an khar a ngai.