Goal nga nen United an tho chhuak

Manchester United chuan pre season match hmasa berah Wrexham an hneh loh hnuah an tho chhuak leh nghal a, Inrinni khan Norwegian club Rosenborg chu 5-0 in an sawp.

Red Devils tan Shea Lacey, Joshua Zirkzee, Jacob Devaney, Harry Amass leh Ethan Williams ten goal khat ṭheuh an khung a, Rosenborg lamin a chhanletna tur an nei ve lo.

Inkhel ṭan aṭangin Michael Carrick-a nauten inkhel an thunun nghal a, Bryan Mbeumo leh Patrick Dorgu ten chance an nei nghal a, mahse an chhawr ṭangkai thei lo ve ve.

Minute 31-naah Zirkzee ball pek ṭha zet chu Lacey-a'n um lutin, a duhtawka a siam rem hnuah mawi takin a pet kual lut a, a team hma a hruaipuiin United an hawi kir tawh lo.

Second half-ah United-in goal li ngawt an khung a, Zirkzee-a'n a thiam thil pholanga bul ṭanin, minute 56-naah defender leh keeper a bum tlang hnuah goal ruakah a khung a, an goal hnihna khungtu Dutch forward a hmuhnawm bakah a ṭangkai takzet.

Minute sarih hnu lawkah Devaney chiang zetin an goal thumna a khung a, Amass leh Williams ten tibuaitu nei loin goal ruakah an khung ve ve a, nuamsa takin United an chak.

Chelsea aṭanga Man United-in an lak thar Andrey Santos-a'n bul a ṭan a, senior player zingah Leny Yoro, Harry Maguire, Ayden Heaven, Luke Shaw, Mason Mount, Zirkzee, Dorgu leh Mbeumo ten bul an ṭan bawk

United hian August 1, Inrinni zanah Atletico Madrid nen Strawberry Arena, Sweden-ah friendly match an khel leh nghal dawn a, World Cup khela fehchhuak zingah Bruno Fernandes, Diogo Dalot, leh Matheus Cunha ten squad an zawm leh tawh tura beisei a ni.