City-ah Khusanov a nghet

Manchester City defender Abdukodir Khusanov chuan an contract thar a ziak a, a contract hi kum nga daih niin a hmang zo a nih chuan Etihad Stadium-ah 2031 thleng a awm dawn.

Kum 22 mi Khusanov hian nikum January khan French club RC Lens aṭangin City hi £33.5-in a zawm a, tun thlengin City tan inelna hrang hrangah match 34-ah a inlan tawh.

Uzbekistan defender chuan, "Contract thar ka ziak thei hi ka lawm takzet a, kei leh ka chhungte tan hriatreng tlak a niin ka hria. Helai hmuna ka lo kal tirh aṭang khan nuam ka ti nghal a, hma ka sawn phah nasa bawk.

Tunah chuan chona thar hmachhawn turin ka inpeih leh tawh a, kan boss thar Enzo Maresca hnuaiah hmun pawimawh chan tumin ka bei dawn a, chumi tur chuan theihtawp ka chhuah dawn a ni," a ti.

Khusanov hian Citizens tan rinrawl ni pha chiah lo mah se hmabak eng tak a nei a, World Cup khelh zawh takah khan an ram tan a fehchhuak bawk. A naupan ngaihtuahin tawnhriat a ngah hle.

City director Hugo Viana chuan, "England a lo thlen aṭanga Khusanov hmasawn dan hi a mak a, min tilawm hle. Puitling takin a rawn khel chho thei a, mahse hei hi a bul ṭanna chauh a la ni tih kan hria. Theihna sang tak a nei a, a thiamna hi mi na zawngin an neih theih loh a ni.

Kum 22 chauh a la ni a, a hmabak hi ko tak angin lang mah se puitling takin a hmachhawn theih kan beisei a, Khawvela a ṭha ber ni thei turin a theihna a nei a, chumi kawngah chuan a theih ang angin kan pui dawn," a ti.

Tun hnaiah Khusanov hi City player zinga contract thar ziak pahnihna a ni a, Lens defender hlui hma hian Phil Foden chuan kum li dang atan inremna thuthlung thar a lo ziak tawh. English midfielder Foden hi club dang nen sawizawm ni mah se club tan rinawm a thlang.