Vozinha-a'n club thar a nei

Kumin World Cup-a keeper lar bera chhal ngam Vozinha chuan Chile club Colo Colo tan a khel dawn a, Inrinni khan mimal thilah inremna nei tawhin he thu i chhiar meuh chuan contract a ziak tawh a rinawm.

Kum 40 mi Vozinha hi Slovakia, Angola, Moldova, Cyprus leh Portugal te a lo khel tawh thin a, Portuguese second division club Chaves-a a contract a tawp hnuin, club nei loin World Cup-ah an ram Cape Verde tan a fehchhuak.

An match hmasa berah European champion Spain chu goal awm loin an inhnehtawkpui a, Vozinha hian vawi sarih ngawt save a nei a, Spain hi champion zuiin Cape Verde chiah hi an hneh theih loh awmchhun an ni bawk.

World Cup knockout stage thleng thei zinga ram te ber Cape Verde hian Lionel Messi telna Argentina chu round of 32-ah an hmachhawn zui a, a vanduai zawkah ṭangin 3-2 in an tlawm a, mahse Vozinha a che ṭha lehpek a, mipui thlan 'team of the tournament'-ah a lang pha hial.

Colo Colo president Anibal Mosa chuan, "Vozinha hi Colo Colo player a ni tawh dawn a, Chile a rawn thlen veleh medical test te a nei ang. World Cup khel phâk keeper kan nei thei tur hi a lawmawm kan ti takzet," a ti.

Mosa chuan Vozinha chu World Cup-a a chet ṭhat avangin club thar neih hi a phu hliah hliah a, Colo Colo tan pawh Vozinha lut hi field chhung bakah sumdawnna lamah pawh hlutna a rawn thlen belh dawn tih a sawi bawk. Colo Colo hi Chile khawpui Santiago-a awm a ni a, an ram league sang ber Liga de Primera-ah hmahruaitu an la ni mek.

Vozinha transfer hi chiang taka tihfel la ni rih lo mah se, Colo Colo chuan social media lamah a hming leh hmel tarlang lo mah se, Vozinha a ni tih hriat theih tak turin thlalak an phochhuak der tawh a, thil danglam a thleng thut a nih loh chuan Vozinha an lak luh a rinawm.