Mizoram huap silai inkahsiak zo fel

Mizoram Rifle Association chuan July 20-25, 2026 khan 17th Mizoram State Shooting Championship 2026 (Rifle & Pistol Event) hlawhtling takin an buatsaih. Inelna hi MRA 10m Shooting Gallery (R. Dengṭhuama Hall, Mualpui), MRA 50m Shooting Range (Falkland) leh 3rd Bn. MAP Firing Range (Mualpui)-ah te neih a ni a, July 25, Inrinni khan Thara Resort, Falkland Vengah ruai nen a kharna hun hman a ni.

Intihsiaknaah hian district pasarih Aizawl, Lunglei, Lawngtlai, Champhai, Saitual, Serchhip leh Mamit Rifle Association te bakah Mizoram Police Shooting Club aṭangin silai kah thiam thlan chhuah mi 137 an kalkhawm a. Event hrang hrang 10m Rifle, 10m Pistol, 25m Standard Pistol, 25m Sports Pistol, 25m Centre Fire Pistol, 50m Free Pistol, 50m Rifle Prone, 50m Rifle 3P, 50m Rifle Open Sight Prone, 10m Pistol ISSF leh 10m Rifle ISSF te hmangin inelna neih a ni.

Inelna aṭang hian 13th Northeast Zone Shooting Championship 2026-a Mizoram aiawh tur thlan chhuah a ni a, inelna hi Guwahati-ah neih a ni ang. 17th MSSC 2026 kharna hunah hian Mizoram Rifle Association chuan District Rifle Association 11 te hnenah match grade air pistol leh air rifle an pe ṭheuh bawk.