Aizawl FC hmaah Rozama 'MLS FC'

I Day Football-ah vawiin chawhma dar 11:00 hian Aizawl FC an inlan dawn a, coach Lalrozama Fanai enkawl MLS FC an hmachhawn ang. Rozama hian Aizawl FC tan a khelh tawh bakah Indian Football League club hi a enkawl tawh a, Bawngkawn tlangval hian a club hlui hneh ngei a tum ang.

Lawngtlai club MLS FC hian season liam ta khan a vawi khat nan MPL an khel a, semifinal an khel pha hial. MLS FC hi Dr. Paul Lalchungnunga kaihhruaina hnuaia din a ni a, club hming pawh hi a fate Meideilin, Larry leh Sebastian te hming tir zel lak a ni.

MLS hi a dintirh hian Lawngtlai lama football-a sulhnu nei ṭha bera chhal ngam Vanlalpeka'n a ho a, season liam ta MPL tawp lamah Lalruatliana Sailo (Tawia) a enkawl thung. Tun season ṭan hma khan season liam taa Churchill Brothers enkawltu Rozama an lalut a, beiseina sang tak a nei dawn.

Lawngtlai club hian team thuam chak nan goalkeeper Thlamuanpuia, defender Laldanmawia, midfielder K. Hmangaihkima leh forward Felix Lalruatsanga te an la lut. Tlarhma lamah Santosh Trophy hnuhnung bera Mizoram team-a tel HC Willis Byhna leh Falton N. Beirachakhei te an chelh theih bawk avangin Aizawl FC tan zuam ngawt a rem lo ang.

Aizawl FC-in kalphung nghet an nei a, NorthEast aṭanga I League champion thei awmchhun ni mah se sum an seng tam uchuak ngai lo. IFL club hian coach Lalruatfela chungah rinna an nghat a, an Lalawmpuia leh Lalhriatpuia te chhuak mah se squad thuam chakna tur player an lalut tho.

Coach R-a hote hian I Day Football an la thutak a, champion ngei an tum. Goalkeeper-ah CYMA Football best goalkeeper RS Lalawmzuala an lalut a, season liam taa SYS FC innghahna Vanlalramnghaka bakah an player hlui Lalchhanhima Sailo te an lakbelh. Mizo club hian an player pawimawh goal khung khawl Zomuansanga leh defender rinawm Rohmingthanga te an la nei a, khelh dan nghet an neih avangin champion rinkai an ni hial ang.