National MMA-ah Mizoram che ṭha

MMA India National championship neih zawh takah Mizoram an che ṭha a, Mizoram State Mixed Martial Arts Association (MISMA) hminga tel fighter te chuan a pumpuiah pathumna dinhmun hauhin an lo haw.

Indore, Madhya Pradesh-a neih inelnaah hian India chhunga State leh UT 29 aṭangin fighter-ten inelna an hmachhawn a, Mizoram hian pathumna dinhmun an luah thei a ni.

July 24-a neih ṭan inelna hi niminah a tawp khar niin, Mizoram team hian gold medal pasarih an hlawh chhuak a, silver medal pahnih leh bronze pakhat an la tel bawk.

MISMA chuan thuchhuah siamin, "Mipui min thlawpnaah kan lawm takzet a, medal la pha lote pawh hi individual weight ranking-ah pangana an ni pha vek a ni," an ti a, gold medalist-te hi international event awm tur atan thlan an ni nghal.

Mizoram team hi coach Lalrinawma, Hunthar Veng chuan kaihruaiin, inelnaa official (referee & judge) niin Republic Vengthlang tlangval Lalchhuanmawia a tel bawk.