Police point hmuhna Talea goal mawi

I Day Football-ah nimin khan Mizoram Police leh Saikhamakawn te an inkhel a, Lalrindika Hmar kaihhruai SKK-in Lalmuanpuia hmangin goal khung hmasa mah se Police tan substitute Lalnunsanga (Talea) goal ropui a khung a, 1-1 in inkhel a tawp.

Group B-ah Saikhamakawn FC leh Mizoram Police FC bakah Manipur club GangGam SC te an awm avangin group of the death-a ngaih a ni a, hei vang hian nimina RG Stadium-a inkhel pawh hi a pawimawh hle.

Saikhamakawn chungnung hret mah se goal an khung thei bik lo a, minute 73-naah Lalmuanpuia'n goal hmahruai a khung a, Police tlarhnung a phui tawk lo. Hun tawp lamah Police danglamna a lang a, Talea'n a ke vei lamin box pawn aṭangin a goal kilah tak a hlai lut a, goal mawi bik a ni. Goal dang lut belh tawh loin 1-1 in inkhel a tawp.

July 29, Nilaini chawhnu dar 1:30 hian Mizoram Police FC leh GangGam SC te an inkhel dawn a, 2024 I Day Football champion Police tan a chhe berah point khat hmuh a pawimawh ang. Saikhamakawn hian Manipur club hi July 31, Zirtawpni tlaiah a hmachhawn leh dawn a, result hre saa khel tur an nih avangin knockout stage lut turin group B aṭangin an dinhmun a ṭha ber.