Pirlo-a'n Italy enkawl dawn lo

Italy coach ni tura mi tam takin an ngaih tawh Andrea Pirlo chuan Italy a enkawl leh dawn lo a, kum 47 mi manager hian social media lamah an ram team a enkawl loh tur thu hi a tichiang tawh.

A zawna World Cup ṭum thum zet khel lo tawh Italy hian coach turin Carlo Ancelotti leh Pep Guardiola te dawr mah se, coach pahnih hian Azzurri sawmna hi an hnar a, Pirlo lam an hawi.

Mahse, Pirlo leh Italian Football Federation (FIGC) te an inrem vek hnuah, Italian legend hi Russian betting company pakhat nen an thawh dun avangin Italian politician ten nasa takin an sawisel a, Pirlo an ruai leh dawn lo.

Pirlo hi nikum October aṭang khan Fonbet-ah global ambassador a ni a, Russia nena inzawmna a neih hi Italian politician tam takin an duh lo a ni ber.

Kum 47 mi Pirlo chuan, "Italian national team enkawl tura candidate zinga mi ka ni lo tih ka hriat takah chuan thuchhuah siam ngaiin ka hria a ni.

"Tun hnaiah ka hming lam rik a ni nasa a, ngawi rengin ka lo thlir a ni," a ti a, Fonbet nena an thawhdunna chu UAE club United SC a enkawl mek nena inthlunzawm a nih vang chauh a nih thu a sawi a, "Ka ngaihdan ang lo takin politics thilah pawh luh a ni ta a ni," a ti.

Pirlo lakluh a nih dawn tak lohah chuan, tun hnaia FIGC technical director atana lak thar ‌Paolo Maldini chuan a hna hi kalsan a tum nia sawi a awm a, tun dinhmunah Italy coach hlui Antonio Conte leh Roberto Mancini te chu Italy enkawl turin an hming a ri ring hle.