Rogers & Palmer an khel dun thei - Alonso

Chelsea boss thar Xabi Alonso chuan Morgan Rogers an lakluh chuan club fachuam Cole Palmer dinhmun a tihdanglam loh thu sawiin, player pahnih chu khelh dun tir tura ruahmanna a siam thu a sawi.

Blues hian Rogers la lut tur hian pound maktaduai 117 ngawt an seng a, British player man to ber record thar a siam. Alonso chuan, "Rogers-a khelhnaah player ṭha tak kan mamawh belh a, Rogers aia thlan tur an tam chuang lo a ni.

"Club tana danglamna thlen nghal thei kan mamawh a, Rogers hian Chelsea-a danglamna thlen turin hun a mamawh tam dawn lo. Blues-ah hian top player lak kan tum a, Rogers hi chutianga top player zinga mi chu a ni," a ti.

England international Rogers hian Stamford Bridge-ah kum ruk atan contract a ziak a, kum khat dang pawhsei theihna dan a awm tel bawk - Rogers leh Blues-a a khelhpui tur Palmer-te hian, football khawvela ṭhian ṭha tak an nih thu an lo sawi ve ve tawh.

Alonso chuan, "Ruahmanna ka nei sa a, idea ka nei sa a ni. Player pahnih hi ṭha takin an khel dun thei ang," a ti a, a player-te piahlamah amah pawh a inringtawk hle.

Spanish coach chuan, "Team hi a inchawhpawlh a ngai ve ṭhin a, a inbuk tawk tur ang taka team kan rem theih chuan, kan khelh danah pawh ball kan chan leh chan loh lai thlengin kan hlauhawm thei ang," a ti.

Blues hian Crystal Palace aṭangin Maxence Lacroix an la lut dawn bawk a, £52mtd an inseng ang - he thuziak i chhiar meuh chuan London club hian official takin an puangzar tawh hial ang.